УИХ-ын чуулганы Баасан гаригийн /2013-06-28/ үдээс хойшхи хуралдааны эхэнд УИХ-ын гишүүн Б.Гарамгайбаатараас Уул уурхайн сайдад тавьсан “Газрын тосны бүтээгдэхүүний үнийн хэлбэлзлийг тогтворжуулах ажлын хүрээнд Монголбанк, Уул уурхайн яамтай хамтран 2012 оны 10 дугаар сарын 26-ны өдөр баталсан Шатахууны жижиглэнгийн худалдааны үнийг тогтворжуулах дэд хөтөлбөрийн явц байдлын талаарх асуулга”-ын хариуг сонслоо. Танилцуулгатай холбогдуулан гишүүд асуулт асууж хариулт авсан.

УИХ-ын гишүүн Д.Батцогт: Олон улсын эдийн засгийн форум дээр ОХУ-ын эрчим хүчний сайд газрын тос олборлолтын хэмжээ тогтмол буурч байгаа гэсэн. Манай улс ОХУ-аас нийт зах зээлийнхээ 91 орчим хувийг хангадаг. Энэ нөхцөл байдалд манай яам, Засгийн газар хэр бэлтгэлтэй байгаа вэ. Анхаарч буй зүйл байна уу.

Ховд аймагт АИ-92 бензин 2050 төгрөг, эндээс 430 төгрөгийн зөрүүтэй байна.

Сая уул уурхайн ажлын хэсэг ОХУ-тай хийсэн газрын тосны бүтээгдэхүүнтэй холбоотой гэрээ хийхэд ажилласан байна. Үүний үр дүн байна уу. Мөн жижиглэнгийн үнэ 50 төгрөгөөр буусан гэсэн ч манай Ховд аймагт хэрэгжээгүй.

Тойрогтоо ажиллахад иргэд маш их шүүмжлэлтэй хандаж байна. Ховд аймагт АИ-92 бензин 2050 төгрөг, эндээс 430 төгрөгийн зөрүүтэй байна. Нийслэлээс хэт алслагдсан аймгуудын нефтийн бүтээгдэхүүний хангамжийг сайжруулах талаар ямар бодлого барьж байгаа вэ гэлээ.

Уул уурхайн сайд Д.Ганхуяг: Бид шатахуунаа олон үүсвэрээс авдаг болсон.

Уул уурхайн сайд Д.Ганхуяг: Энэ материал гурван сард тараагдсан. Өнөөдрийн байдлаар Орос нефть компаниас бид 60 хүрэхтэй үгүйтэй хувийг нь л авч, бусдыг нь Хятад, Солонгос гээд Оросын бусад компаниас авч байгаа. Үүсвэрийн хувьд олон үүсвэрээс авдаг болсон.

Орос нефть компаниас харьцангуй өндөр үнээр авч байсныг судалж тогтоогоод өөрсдийнх нь газрын тосны үнээс газрын тосны бүтээгдэхүүнийг тооцдог олон улсын аргачлалаар явахыг Орос нефть компани хүлээн зөвшөөрөөд сая хилийн үнээ зургаан сард 150-260 доллараар бууруулсан. Орон даяар 50 төгрөгөөр бууруулсан байх ёстой.

Ер нь баруун бүс тал руугаа янз янз бий. Хотоос зөөвөрлөсөн тохиолдолд тээврийн зардал нэмэгдэх асуудал байх шиг байна. Ховд аймгийн тухайд жижиглэнгийн шатахууны нөлөө бүхий компаниуд ажилладаг. Цаашид баруун зүүн талын аймгуудад гаргаж буй газрын тосныхоо оронд аль болох хямд газрын тосны бүтээгдэхүүн нийлүүлэх бодлогыг баримталж ажиллах болно.