Монгол Улсын 2025 оны төсвийн тухай хуулийн эхний хэлэлцүүлгийг хийгээд байгаа билээ. Ирэх оны төсөвтэй холбоотойгоор Ёс зүй, дэгийн байнгын хороо хуралдсан. Хуралдааны үеэр УИХ-ын гишүүн Б.Хэрлэн байр сууриа илэрхийлж асуулт асуулаа.

УИХ-ын гишүүн Б.Хэрлэн:

Нэгдүгээрт, төрийн бүх байгууллагууд 2013 оноос эхлэн үр дүнд суурилсан менежмент буюу хөтөлбөрөөр төсөвлөх аргыг хэрэгжүүлээд явж байгаа. Өөрөөр хэлбэл, зарцуулж байгаа 1 төгрөг ч гэсэн тодорхой нэг үр дүнд чиглэсэн, тодорхой нэг хөтөлбөрт хамаарсан байх ёстой гэсэн санаагаар хөтөлбөрийг хийж яваа. Үр дүнд чиглэсэн энэ менежмент бол тухайн байгууллагын бүтэц, зохион байгуулалт, хөтөлбөр, төлөвлөгөө, төсөв гээд бүх зүйлтэй нь уялдаж байдаг цогц үзэл баримтлал.

Тэгэхээр Төрийн албаны зөвлөл 2025 оны төсвөө 10 хөтөлбөрөөр төлөвлөж төсөвлөсөн байна. Гэхдээ энэхүү хөтөлбөрөө Төрийн албаны тухай хуулинд тусгагдсан чиг үүргүүдийн дагуу хийв үү. Учир нь гэвэл “Төрийн албан тухай хуулийг эрчимжүүлнэ” гэсэн байна. Тэгэхээр Төрийн албаны зөвлөл өнөөдөр хууль санаачлах эрхтэй байгууллага мөн үү. Танай байгууллагын бүрэн эрхэд туссан уу. Гол нь хэрэгжүүлэх хөтөлбөртөө төсөвлөх гэсэн энэ зарчмаар ажиллахад чиг үүрэг болоод төсөв мөнгөтэйгөө уялдуулахад ямар асуудал тулгарч байна вэ. Үүийгээ тулгаж харсан уу.

Хоёрдугаарт, Төрийн албаны зөвлөлийн цалин хөлс болон нэмэлт урамшууллын нийт хэмжээ 7.211.9 тэрбум төгрөг. Харин бусдаар гүйцэтгүүлэх ажил үйлчилгээний төлбөр нь 8.397.7 тэрбум гэж байна. Тэгэхээр үүнээс харахад Төрийн албаны зөвлөлийн орон тоог нэмэх хэрэгтэй гэсэн үг үү. Яагаад гэвэл нийт албан хаагчдынхаа цалингийн сангаас давсан өртөг зардлаар бусдаар ажил гүйцэтгүүлэхээр байна. Тэгэхээр Төрийн албаны зөвлөлийг цаашид бэхжүүлье гэвэл 80 хүний орон тоотой ажиллаж байгаа бол 160 хүний орон тоотой ажиллах зайлшгүй шаардлага байна гэдэг утга эндээс харагдаж байна. Үүнийг тайлбарлах хэрэгтэй.

Түүний асуултад Төрийн албаны зөвлөлийн дарга Л.Цэдэвсүрэн хариуллаа.