УИХ дахь АН-ын бүлэг энэ долоо хоногт хэлэлцэх асуудлуудад байр сууриа нэгтгэлээ.

Хямралын эсрэг авах арга хэмжээний тухай төслүүдэд шүүмжлэлтэй хандсан байна. УИХ-аас өмнө нь гаргасан шийдвэрүүд хүчинтэй хэвээрээ байхад нэмж тогтоол гаргах шаардлагагүй гэж гишүүд үзэж. хямралаас гарах өмнөх тогтоол хэрхэн хэрэгжиж байгаа талаар мэдээлэл байхгүй учир өмнө нь батлан гаргасан тогтоол болон Оюу толгой, Таван толгойтой холбоотой шийдвэрүүдийг ч УИХ-аас өгсөн чиглэлийн дагуу хэрэгжүүлэх нь зүйтэй гэж тус бүлэг санал нэгджээ.

Гацууртын ордын 20 хувийг төр эзэмших тухай тогтоолын төслийг хэлэлцээд дэмжсэн байна. Харин 2015-2016 онд хувьчлах төрийн өмчийн талаар Төрийн өмчийн хорооноос мэдээлэл авах шаардлагатай гэлээ. Мэдээллийн төгсгөлд сэтгүүлчдийн асуултад АН-ын бүлгийн дарга Б.Гарамгайбаатар ийм хариулт өглөө. 

-Эдийн засгийн хүндрэлээс гарах зарим арга хэмжээний тухай төлөвлөгөөг шинээр гаргах шаардлагагүй гэсэн үг үү?  

Өмнө нь Эдийн засгийг идэвхжүүлэх, эрчимжүүлэх талаар УИХ-аас гаргасан хоёр тогтоол бий. Тэдгээр тогтоолд тусгагдсан асуудлууд давхардаж орсон байгаа тул өмнө гаргасан шийдвэрийг Засгийн газар хэрэгжүүлээд явах нь зүйтэй гэдэг асуудал ярьсан. Таван толгой, Оюу толгойтой холбоотой асуудлуудад ч ялгаагүй, өмнө нь өгсөн чиглэл зөвлөмжүүдийн дагуу шийдээд явах ёстой. Засгийн газарт ийм боломж бий гээд энэ асуудлыг оруулж ирсэн төслөөр нь хэлэлцэх боломж харагдахгүй байна гэж үзсэн. 

-Ашигт малтмалын тухай хуульд нэмэлтээр орж ирж байгаа төрийн эзэмшлийн тухай заалт нь тодорхой ордуудад нэр зааж үйлчлэх үү эсвэл эрх зүйн орчинг урьдчилан бүрдүүлье гэдэг агуулгаар яригдаж байна уу? 

Ашигт малтмалын тухай хуулийн 5.3, 5.5-д стратегийн ач холбогдол бүхий ордод ашигт малтмалын нөөц ашигласны төлбөрт өөрчлөлт оруулж байгаагаа Засгийн газраас албан ёсоор тайлбарлалаа. Энэ нь 34 хувьтай холбоотой юм байна.

Мөн Гацууртын ордод хувь эзэмших асуудалтай холбоотой өөрчлөлт ч байна. УИХ Ашигт малтмалын тухай хуулийг түрүүлээд баталчихвал одоо маргаан дагуулаад байгаа Гацуурттай холбоотой асуудлыг шийдвэрлэх нөхцөл бүрдэнэ гэсэн үг.