УИХ-ын гишүүн, Нийгмийн бодлого, боловсрол, соёл, шинжлэх ухааны байнгын хорооны дарга З.Баянсэлэнгэ, УИХ-ын гишүүн М.Батчимэг, С.Одонтуяа нар “Интермед” эмнэлгийн барилгын гүйцэтгэлийн явцтай танилцлаа.

Энэ эмнэлгийг барьж байгуулан иргэдэд эмнэлгийн тусламж үйлчилгээ үзүүлэхээр зорин ажиллаж байгаа төслийн баг олон улсын жишигт нийцсэн, Дэлхийн Эрүүл Мэндийн Байгууллагаас тогтоосон эмнэлгийн стандарт болон JCI стандартад хүрсэн өндөр хүчин чадал бүхий эмнэлэгтэй болох зорилт тавин барилгын ажлаа 2005 онд эхлүүлсэн байна.

Олон улсын эмнэлгийн үйлчилгээний стандартыг нэвтрүүлсэн “Интермед” эмнэлгийн барилгын ажлыг дотоодын 100 хувийн хөрөнгө оруулалтаар Энержи Ресурс, М-Си-Эс, Шунхлай зэрэг үндэсний томоохон компаниуд хэрэгжүүлж байна.

Тус эмнэлэг нь мэс засал, дотор, эх барих, эмэгтэйчүүд, хүүхдийн тусламжийн үйлчилгээг иргэдэд үзүүлэх бөгөөд 90 ортой, амбулаторийн тусламж үйлчилгээгээр өдөрт 500 хүнд үйлчлэх хүчин чадалтай томоохон эмнэлэг болох юм.

Интермед” эмнэлэг нь олон улсын эмнэлгийн стандартын дагуу баригдаж байгаа.

Радиологийн тасаг болон онош зүйн лаборатори нь Азийн өндөр хөгжилтэй орнуудын томоохон эмнэлгүүдийн хэмжээнд үнэлэгдсэн стандарттай байна гэдгийг төслийнхөн хэллээ.

УИХ-ын гишүүн, Нийгмийн бодлого, боловсрол, соёл, шинжлэх ухааны байнгын хорооны дарга З.Баянсэлэнгэ энэ үеэр төслийн захирал Т.Болормаагаас, эмнэлгийн барилгын үйл явцад болон бүрэн ашиглалтад оруулахад ямар бэрхшээл тулгарч байгааг тодруулсан юм.

Төслийн захирал Т. Болормаа хэлэхдээ, эмнэлэгт хэрэглэгдэх нийт 800 төрлийн эм, эмийн бүтээгдэхүүнээс 500 төрлийн эм, эмийн бүтээгдэхүүн нь манай улсын эмийн бүртгэлд бүртгэгдсэн эм байгааг хэлээд үлдсэн 300 төрлийн эм, эмийн бүтээгдэхүүн нь манай улсын эмийн бүртгэлд бүртгэгдээгүйн улмаас хилээр оруулж ирэх болон улсын эмийн бүртгэлд бүртгүүлж, үйлчилгээнд ашиглахад бэрхшээлтэй байгаа гэлээ.

Цаашид эмэгтэй гишүүд эмнэлэг барих болон эм, эмийн бүтээгдэхүүний эрх зүйн орчинг сайжруулахад анхаарч ажиллахаа дуулгалаа.

УИХ-ын гишүүн С.Одонтуяа хэлэхдээ,“Интермед” эмнэлэг нь олон улсын эмнэлгийн стандартын дагуу баригдаж байгаа мөн үндэсний мөнгөн тэмдэгтээр Азийн хөгжилтэй орнуудын томоохон эмнэлгийн үйлчилгээг эндээс авах боломжтой болсныг сайшаагаад,эрүүл мэндийн даатгалын тогтолцоог хувийн эмнэлгүүдэд түлхүү хэрэгжүүлж, иргэдэд ялгаваргүйгээр чанартай үйлчилгээ үзүүлэх боломж бүрдэж байгааг онцоллоо.

Харин УИХ-ын гишүүн М.Батчимэг Олон улсын эмнэлгийн стандартыг Монгол Улсад нэвтрүүлж, энэ стандартад нийцсэн эмнэлэгт ажиллах боловсон хүчинг БНСУ-д тусгайлан сургалтад сургаж хөрөнгө оруулалт хийж байгаад талархаж байгаагаа хэлсэн юм. Цаашид эмэгтэй гишүүд эмнэлэг барих болон эм, эмийн бүтээгдэхүүний эрх зүйн орчинг сайжруулах талаар анхаарч ажиллана гэдгээ энэ үеэр дуулгалаа.