Монгол Улсад барилгын инженерийн мэргэжилтэй боловсон хүчин бэлтгэж эхэлсэний 50 жилийн ой энэ онд тохиож байгаатай холбогдуулан Монгол Улсын Шадар сайд М.Энхболд 2011 оны 6 дугаар сарын 16-ны өдөр ахмад барилгачдыг хүлээн авч уулзлаа. Тухайн үед 23 хүн дээд сургууль төгсөж байсан бөгөөд 40 мянгатаас эхлээд бусад олон барилга, байгууламж, орон сууцны хорооллыг босгоход хүчин зүтгэж байсан нэр бүхий ахмадууд уулзалтад хүрэлцэн иржээ. Шадар сайд, Орон сууц хөтөлбөрийг эрчимжүүлэх үндэсний хорооны дарга, Мон
гол Ардын намын нарийн бичгийн дарга М.Энхболд ахмадуудад Засгийн газрын нэрийн өмнөөс болон хувиасаа 50 жилийн ойн баярын мэнд хүргэж, сайн сайхныг хүсэн ерөөв.

Барилгын инженерийн боловсрол эзэмшсэн шижигнэсэн залуус тухайн үед өрнөж байсан бүтээн байгуулалтад оролцож эхэлснээр барилгын салбарын өнөөгийн хөгжилд үнэлж баршгүй хувь нэмэр оруулсан. Засгийн газраас хэрэгжүүлж байгаа "Шинэ бүтээн байгуулалт", "100 мянган орон сууц" хөтөлбөрийн хүрээнд 2011-2012 онд бүтээн байгуулалтын далайцтай ажил хийнэ. Иргэдийн ахуй амьдралд чухал нэмэр болох эдгээр хөтөлбөрийг үр дүнд хүргэхэд ахмад барилгачдын мэдлэг, туршлага, зөвлөгөө ихээхэн хэрэгтэй байна гэж Шадар сайд М.Энхболд хэлэв. Тэрээр уулзалтын дараа ахмадуудад МАН-ын дээд шагнал болох Тусгаар тогтнолын одон гардуулж баяр хүргэсэн байна.