Цалин, тэтгэвэр, тэтгэмж нэмэгдүүлэхээр 2015 оны улсын төсвийн төсөлд тусгасан хөрөнгийн эх үүсвэрийг нэмэгдүүлэх тухай саналыг НББСШУ-ны Байнгын хорооны дарга Д.Батцогт, Төсвийн байнгын хорооны дарга Ц.Даваасүрэн хаяглан хүргүүлсэн байна.

Учир нь 2015 оны улсын төсвийн төсөлд төсөвт байгууллагад ажиллагсдын цалин болон тэтгэвэр, тэтгэмжийг нэмэгдүүлэхээр тусгасан хөрөнгийн эх үүсвэр нь зөвхөн 2014 оны инфляцийг нөхөх хэмжээнд тооцсон хөрөнгө байгаа нь хүн амын амьжиргааны өнөөгийн хүндрэлийг багасган иргэдийн худалдан авах чадварын уналтыг сэргээж, орлогын ядуурлыг бууруулахад нөлөөлж чадахгүй хэмээн МҮЭХ-ноос үзэж байгаа юм.

Улмаар монгол хүний хөдөлмөрийн үнэлэмжийг дээшлүүлэх, цалин, тэтгэвэр, тэтгэмжийг бодитой нэмэгдүүлэх чиглэлээр МҮЭХ-ноос байр сууриа УИХ, Засгийн газар, Хөдөлмөр, нийгмийн зөвшлийн гурван талт Үндэсний хороонд удаа дараа мэдэгдэж ирсэн билээ.

Энэ байдлыг анхааралдаа авч 2015 оны улсын төсөвт зөвхөн энэ оны инфляцийг нөхөх хөрөнгийг бус улсын төсвийн бусад урсгал зардлыг бууруулах замаар 300 тэрбум төгрөгийг нэмж цалин хөлс, тэтгэвэр, тэтгэмжийг бодитой нэмэгдүүлэх саналтай байгаагаа илэрхийллээ.