Мэдээлэл технологи, харилцаа холбооны салбар  “Эрхзүйн шинэчлэл-2014” нээлттэй өдөрлөг зохион байгуулах гэж байна. Энэ тухай  Монголын цахилгаан холбоо компанийн гүйцэтгэх захирал Ж.Бат-Эрдэнэтэй ярилцлаа.

-Мэдээлэл технологи, харилцаа холбооны салбар  энэ удаагийн нээлттэй өдөрлөгөөр ямар асуудлыг онцолж байна вэ?    

-Мэдээллийн технологи, харилцаа холбооны салбараас  жил бүр уламжлал болгон зохион байгуулахаар зорьж буй ажлын нэг нь  салбарынхаа асуудлаар  мэдээлэл солилцох, хийсэн ажлаа  мэдээлж сурталчлах, нөгөөтэйгүүр хийх гэж байгаа зүйлүүдээ танилцуулах нээлттэй өдөрлөг  юм. Энэ жил хоёр дахь жилдээ зохион байгуулах гэж байна. Ийм хэлбэртэй ч  нэр нь арай өөр зүйлүүдийг бид өмнө нь хийж байсан. Тухайлбал, 2011 онд  “Монгол Улсын харилцаа холбооны салбарын  улсын зөвлөгөөн”-ийг салбарын хэмжээнд  хийсэн.

Хувийн хэвшил, төрийн байгууллага, төрийн өмчийн оролцоотой аж ахуйн нэгжүүд  бүгд оролцдог. Энэ удаагийн өдөрлөгт төрийн байгууллагууд,  Мэдээллийн  технологи, шуудан, харилцаа холбооны газар,   Харилцаа холбооны  зохицуулах хороо,  төрийн өмчит компаниуд  нэлээд давамгайлж өөрсдийн үйл ажиллагааг танилцуулж, бодлого чиглэлээ хүргэхийг зорьж байна.

-Танай  компаниас  өнгөрсөн жилийн  чуулганы үеэр Засгийн газрын бодлогын хүрээнд, ялангуяа  хөдөө орон нутагт  интернэтийн үйлчилгээг  сайжруулах, үнэ тарифыг багасгаж хурд хүчийг  нь  нэмэгдүүлэхэд   хамтарч ажиллах бодлогоо танилцуулж байсан. Хэрэгжилт, үр дүн  нь ямар байна?

- Монголын цахилгааны холбооны салбар  бусад мобайль  операторуудаас  өөр. Өөрийн уламжлалт бизнестэй. Энэ бизнесээрээ болон өөрийн гаргаж буй бүтээгдэхүүнээрээ, нийслэл хот, орон нутаг  болон бусад төвлөрсөн газруудад үүрэн телефоны операторуудтай өрсөлдөх боломж хязгаарлагдмал. Тиймээс интернэтийн хувьд бидний зах зээл орон нутаг руу чиглэсэн урсгал байдаг. Өнгөрсөн жил орон нутгийн интернэтийн үйлчилгээг сайжруулах, үнэ тарифыг бууруулах, хэрэглэгчээ нэмэгдүүлэх чиглэлд багагүй ахиц гарсан.

мэдээж хүчин чадлаасаа хамаарч 600 к-д 17 мянган төгрөг бол 1-2 мегад ямар байх вэ гэдгийг тооцож хэрэглэгчдэд нэвтрүүлж байна.

Оны эцсийн дүн хараахан гараагүй ч гэсэн бидний тооцоолж байгаагаар  шинээр 12 мянган  интернэт хэрэглэгчтэй болсон.Үнэ тарифийн хувьд  өмнө нь 128 к-гийн урсгалыг орон нутгийн хэрэглэгчдэд  20-22 мянган төгрөгөөр нийлүүлдэг байсан.  Энэ нэлээд үнэтэй хэлбэр. Одоо доод хэрэглээ буюу  интернэтийн урсгалыг хамгийн  доод үнээр хамгийн бага хүчин чадлаар авах  боломжит хувилбарыг нь  600 к болгон хүчин чадлыг нь гурав дахин өсгөж,  тарифыг   17 мянган төгрөг  болгосон.

Орон нутгийн хэрэглэгчдийн чадамжид тохируулж  мөн боломжийн үйлчилгээ авах нөхцлийг  техникийн болон үйлчилгээний хувьд бүрдүүлж  өгсөн. Нөгөө талаас мэдээж хүчин чадлаасаа хамаарч 600 к-д 17 мянган төгрөг бол 1-2 мегад ямар байх вэ гэдгийг тооцож хэрэглэгчдэд нэвтрүүлж байна.

- Хэрэглэгчдийн зүгээс хурдаа нэмэгдүүлье, түүндээ тохирсон үнэ тарифийг тогтоож өгөөч, хөнгөлөлт үзүүлээч гэсэн саналыг байнга шахам   тавьдаг. Энэ талаар?

-Үнэ тарифыг байнга хөдөлгөх  нь   сайн  зүйл биш. Тиймээс  бид өөр хэлбэрээр хэрэглэгчдээ дэмжих бодлого руу сүүлийн улиралд нэлээд эрчимтэй ажилласан. Энэ бол интернэтийн модемийг  нь үнэгүй өгч  тодорхой хугацааны гэрээтэй тогтвортой хэрэглэгч маягаар  хэрэглэгчээ нэмэгдүүлэх юм.  Ийм байдлаар бид сүүлийн үед түлхүү ажиллаж байна. Цаашид орон нутгийн интернэт ийн орчинд техникийн шинэчлэл хийх шаардлага бий. Энэ онд интернэтийн дамжуулах байгууламж, холболтын байгууламжид 3-4 тэрбум орчим  төгрөгийн хөрөнгө оруулалт хийж, үйлчилгээгээ сайжруулах чиглэлээр ажиллахаар  төлөвлөж байгаа.

-Монголын цахилгаан холбооны салбарт тулгамдсан асуудлууд  цөөнгүй байдаг. Түүнээс  та юуг нь онцлох бол?

-Мэдээж тулгамдсан  асуудлууд бий. Тэр бол Монголын цахилгааны холбоо компанийн эрхэлж буй өнөөгийн уламжлалт бизнес ашиггүй болсон. Бизнес утгаа алдчихсан. Гэхдээ хэрэглэгч нар маань өнөө хүртэл байгаад байдаг. Тогтмол  үйлчилгээ авдаг 70-80 мянган хэрэглэгч байна. Тиймээс тэдэндээ үйлчилгээг нь таслахгүй хүргэхсэн, найдвартай  бөгөөд баталгаатай байлгахсан гэсэн  сэтгэл, зүтгэлээр чамгүй ажиллалаа. Бизнесийн энэ моделиор бид цаашид ажиллах, 1000 гаруй ажилтантай Монголын цахилгаан холбоо компани хэвийн ажиллахад ихээхэн бэрхшээлтэй.

Тиймээс өнгөрсөн онд бидний хийсэн нэг ажил бол Засгийн газар, Мэдээллийн технолги, шуудан, харилцаа холбооны газар, Ерөнхий сайдын хүрээнд холбогдох шийдвэрүүдийг гаргаж, Монголын цахилгаан холбоо компани цаашдаа бизнесийн ямар загвараар энэ зах зээл дээр үйл ажиллагаа явуулах боломжтой байна вэ гэсэн чиглэлд судалгаа хийх, танилцуулга бэлтгэх, хөрөнгө оруулалт олох чиглэлд анхаарлаа. Энэ талаар  томоохон асуудлуудыг  Засгийн газарт оруулж, үүрэг даалгавар авсан.

Монголын цахилгаан холбоо компани 4G буюу LTE бөөний урсгалын сүлжээний бизнес эрхлэх судалгааны ажлыг өнгөрсөн жил хийж гүйцэтгэсэн.

Тэр дагуу Монголын цахилгаан холбоо компанийн удирдлагын баг Төрийн өмчийн хороо, Мэдээллийн технологи, шуудан, харилцаа холбооны газар  болон холбогдох бусад газруудтай хамтарсан ажлын хэсгийг Ерөнхий сайдын захирамжаар байгуулж, бидний түнш Корей телеком корпорацтай  маш идэвхтэй хамтарч ажиллалаа. Энэ хамтын  ажиллагааны хүрээнд  санамж бичиг зурагдсан.  Монголын цахилгаан холбоо компани 4G буюу LTE  бөөний урсгалын сүлжээний бизнес эрхлэх судалгааны ажлыг өнгөрсөн жил хийж гүйцэтгэсэн. LTE  4G   шинэ технологиудтай  манай хэрэглэгчид нэлээд сайн танилцсан байх гэж бодож байна.

Шинэ технологид тулгуурласан энэ бизнесийг хийх, бизнесийн моделийн загварын судалгаанд  өнгөрсөн хугацаанд Корей тел компанийн  талаас 40 –өөд  хүн, Монголын цахилгаан холбоо компанийн 20-оод мэргэжилтэн хамтарч  гурван сар гаруйн хугацаанд ажилласан. Маш сонирхолтой, сайн судалгааны ажил болсон. Үр дүнг нь бид Ерөнхий сайдад танилцуулсан. Судалгаанаас үзэхэд бизнесийн энэ загвар монголд тохиромжтой гэдэг нь харагдаж байгаа.

-Юугаараа илүү  тохиромжтой гэж үзэж байна?

- 4G буюу LTE  технологид тулгуурласан үндэсний  хэмжээний дэд бүтцийг  байгуулахад маш их хэмжээний хөрөнгө оруулалт шаардагдаж байгаа. Үүнийг  гаднын хөрөнгө оруулалтаар шийдье, өөрөөр хэлбэл бидний түнш Корей тел   компани  энэ судалгаанд  хөрөнгө оруулалт хийж болох юм. Хөрөнгө оруулалтын эргэн төлөгдөх хувь буюу эргэн төлөгдөх чадвар судалгаагаар 30 орчим хувьтай гарсан учраас  энэ ажлыг бид 15 жилийн хугацаанд эрхлэх боломжтой.

Гэхдээ хөрөнгө оруулагч тал мэдээж өөрсдийн эрсдлийг тооцолгүй яахав. Засгийн газарт тодорхой нөхцлүүдийг шаардах ийм эрх бий. Төслийн хүрээнд одоогоор ерөнхий зүйлүүд хийгдэж, танилцуулагдаад явж байна. Нөгөөтэйгүүр, бид Засгийн газрын шийдлийг хүлээж байгаа.