Хоёр улсыг газар доогуур холбох санааг анх 1802 онд Францын уул уурхайн инженер Алберт Матье Фавье гаргасан гэдэг. Гэвч туршилтын ажил 1875 онд эхэлжээ. Харамсалтай нь бүтээн байгуулалтаас илүү цэрэг, батлан хамгаалах салбарт хүч, хөрөнгө зориулдаг байсан үе тул удалгүй ажил зогссон байна. Энэхүү байдал 1950 он хүртэл үргэлжилсэн юм. Үүнээс хойш хэд хэдэн удаа хонгилын ажил эхэлсэн ч хамгийн дээд тал нь 740 метр урагшлаад зогсч байв.

1987 онд хоёр тал энэ байдлыг эцэс болгохоор ярьж тохиролцсон ч бэлтгэл ажилд жил зарцуулж 1988 оноос байгууламжийн ажил жинхэнэ ёсоор эхэлжээ. Нийт 15 мянган хүн дайчилсан бүтээн байгуулалтын ажил долоон жил үргэлжилсэн бөгөөд 16 тэрбум ам.доллар зарцуулж, газрын гүнээс 7000 тонн шороог гадарга дээр асгажээ. Өндөр хурдны галт тэрэгний үйлчилгээний энэ цогцолборыг 1994 оны тавдугаар сарын 6-нд Британийн хатан II Елизабет, Францын Ерөнхийлөгч Франсуа Миттеран нар албан ёсоор нээв. Жилд ойролцоогоор долоон сая зорчигч үйлчлүүлдэг ч эхний зургаан жилд 112 сая хүн тээвэрлэсэн гэдэг.