Эдийн засгийн байнгын хороо  хуралдан "Монгол Улсын эдийн засаг, нийгмийг 2013 онд хөгжүүлэх үндсэн чиглэл батлах тухай" УИХ-ын тогтоолын төслийн анхны хэлэлцүүлгийг хийлээ. Тогтоолын төслийг хэлэлцүүлэгт бэлтгэх, санал, дүгнэлтийн төсөл боловсруулах үүрэг бүхий ажлын хэсгээс анхны хэлэлцүүлэгт бэлтгэсэн талаар гаргасан товч танилцуулгыг УИХ-ын гишүүн Д.Зоригт хийсэн юм.Ажлын хэсэг ийм дүгнэлт гаргахдаа Монгол Улсын эдийн засаг, нийгмийг 2013 онд хөгжүүлэх үндсэн чиглэлийн төсөл нь шинэ Засгийн газрын үйл ажиллагааны эхлэл болохоороо онцлог бөгөөд шинээр байгуулагдах Улсын Их Хурал, Засгийн газар уг үндсэн чиглэлийг бодлого, үйл ажиллагааныхаа хөтөлбөрт нийцүүлэн тодотгох боломжтой гэдгийг иш үндэс болгожээ.