Согтуугаар тээврийн хэрэгсэл жолоодсон шалтгаанаар 2014 онд 1542 зам тээврийн осол гарсан байна.

Мөн нэг шөнийн дотор 70-80 согтуу жолооч цагдаад баригдаж байгаа нь ийм төрлийн зөрчлийн дөнгөж 40% нь юм. Согтуу жолоочоос үүдэлтэй зам тээврийн осолд хүүхдүүд голдуу өртөж байгаа нь санаа зовоосон асуудал юм. Одоо хүчин төгөлдөр мөрдөгдөж байгаа хуулиар согтууруулах ундаа хэрэглэсэн үедээ тээврийн хэрэгсэл жолоодсон жолооч нарт хүлээлгэх хариуцлага бага байгаагаас үүдэн энэ төрлийн осол өсөх хандлагатай байна.

УИХ-ын Эмэгтэй гишүүд Нийслэлийн замын цагдаагийн газартай хамтран “Согтуу жолооч-Хүүхдийн амь нас” сэдэвт хэлэлцүүлгийг зохион байгуулж Замын хөдөлгөөний аюулгүй байдлын тухай хуульд нэмэлт өөрчлөлт оруулахаар ажиллаж эхэллээ. 

Хэлэлцүүлгийн явцад согтуугаар тээврийн хэрэгсэл жолоодсон тохиолдолд 500,000 төгрөгөөр торгох, давтан зөрчил гаргасан тохиолдолд баривчлах, албадан ажил хийлгэх зэрэг хариуцлагыг чангатгах саналууд гарлаа. Зарим орнуудад согтуугар тээврийн хэрэгсэл жолоодсон үед тээврийн хэрэгслийг Улсын орлого болгох хүртэл хариуцлага хүлээлгэдэг гэсэн мэдээллийг хэлэлцүүлэгт оролцогчид хэлж байлаа.  

Төсвийн тодотгол хэлэлцэх үед Баянсэлэнгэ гишүүний санаачлагаар согтуурал шалгах Драгер багаж худалдан авах 450 сая төгрөгийг батлуулав.Ийнхүү шат дараалсан арга хэмжээ авах замаар согтуу жолооч нартай Дайн зарлаж байгаагаа Эмэгтэй гишүүд илэрхийлэв.