УИХ-ын чуулганы /2025.04.03/-ны өдрийн хуралдаанаар Монгол Улсын Ерөнхий сайдаас Улсын Их Хуралд ирүүлсэн Авлигатай тэмцэх газрын дарга З.Дашдавааг улируулан томилуулах тухай саналыг хэлэлцлээ.

Хэлэлцэж буй асуудалтай холбогдуулан гишүүд асуулт асуулаа.

УИХ-ын гишүүн М.Мандхай:

Олон улсын судалгааны байгууллагын гаргадаг авлигын төсөөллийн индексийн үзүүлэлт манай улсын хувьд урагшлахгүй байгаа нь судалгаанд оролцож байгаа оролцогчдын авлига их байгаа гэж төсөөлж байгаатай шууд хамааралтай. Товчхондоо манай нийгэм бүх зүйлийг дабл, стандарт, авлига байгаа гэж бодож үнэлж байгаа. Энэ байдал бидний хөгжлийн үзүүлэлт, амьдралын чанар цаашлаад харилцан итгэлцлийн асуудлыг илэрхийлдэг гэж хувьдаа үзэж байгаа. АТГ-ын тайланг харахад улсад учруулсан хор хохирлыг энэ 6 жилийн хугацаанд барагдуулсан тоон үзүүлэлт бол өссөн байгаа. Мөн 5 ш ажиллагаа хэрэгжиж эхэлснээс хойш багагүй үр дүн гарсан гэж харагдаж байгаа. Авлигалыг бууруулах ажил бол зөвхөн АТГ-ын ажил гэж бас буруу ойлгоод байдаг. Гэтэл хууль тогтоомж хатуу хэрэгждэг, ил тод байх шаардлагатай.

Мөн шүгэл үлээгчийн тухай хуулийг яаралтай батлуулж хэрэгжүүлэх хэрэгтэй. Эдийн засгийн өсөлт сайжрах тусам энэ авлигын индекс буурах боломж үүсдэг. Бид нарт тулгамдаад байгаа нэг асуудал бол төрийн албан хаагчдын иргэдэд үзүүлж байгаа хүнд суртлыг бууруулах, иргэдийг мэдэгжүүлж, чадавхжуулах ойлголтыг өгөхгүй бол ганц, нэг байгууллагын асуудал мэт ярьж байгаа.Үүнийг засаж залруулах хэрэгтэй. Авилын хэрэг нууц далд байдалд хийгддэг, эрх бүхий албан тушаалтнуудтай холбогддог учраас энэ язгуур үндсийг нь таслан зогсооход зөвхөн АТГ-ын ажил биш. Засгийн газар, яам, агентлаг, иргэний нийгмийн байгууллага, ТББ, иргэд, олон нийтийн оролцоог хангаж байж авлига буурах юм.

Сэтгүүлч

Сэтгүүлч Ц.Соёлмаа soyolmaa@vip76.mn