УИХ-ын Хууль зүйн байнгын хорооны хуралдаан өнөөдөр болж, Хүний эрхийн дэд хорооны даргаар УИХ-ын гишүүн Д.Ганбатыг сонгох тухай асуудлыг хэлэлцэн гишүүдийн 100 хувийн саналаар дэмжин баталлаа.  Мөн хуралдаанаар Монгол Улсын 2012 оны төсөвт тодотгол хийх тухай болон бусад холбогдох хуулийн төслүүдийн анхны хэлэлцүүлгийг хийлээ. Төсөвт тодотгол хийснээр хууль хяналтын байгууллагад 981 сая төгрөг нэмж тусгахаар болсон байна.  Харин эл хөрөнгийг гэмт хэргээс урьдчилан сэргийлэх чиглэлээр зарцуулах шаардлагатай гэж УИХ-ын гишүүн Ж.Батзандан мэдэгдсэн юм. Ингээд эл асуудалтай холбоотойгоор өөр санал хэлэх гишүүн байсангүй тул анхдугаар хэлэлцүүлгийг дуусгав.

Гуравт нь Шүүх байгуулах тухай хуульд нэмэлт, өөрчлөлт оруулах тухай хуулийн төсөл, Шүүгчийн орон тоо тогтоох тухай, Тогтоолын хавсралтад нэмэлт, өөрчлөлт оруулах тухай УИХ-ын тогтоолын төслийн анхны хэлэлцүүлгийг хийлээ. Эл тогтоолын хүрээнд сум дундын шүүх байгуулах тухай асуудал хөндөгдөж байна. Сум дундын шүүх нь гурван хүний бүрэлдэхүүнтэй байна, зардал нь жилдээ 24 сая төгрөг болно. Эл асуудлыг гишүүд санал нэгтэй дэмжин анхны хэлэлцүүлгээр нь батлах нь зүйтэй хэмээн үзэж, чуулганы нэгдсэн хуралдаанд оруулахаар болж шийдлээ.