Эдгээр уулзалт, хэлэлцээрээр Оюутолгой төслийг БНХАУ-аас импортоор авах цахилгаан эрчим хүчээр түр хангах асуудлыг ойрын хугацаанд шийдвэрлүүлэх, уул уурхайн бүтээгдэхүүний хилийн худалдааг олон улсын худалдааны хэм хэмжээнд нийцүүлэн журамлах талаар санал солилцов. Мөн хилийн боомтын бүтээн байгуулалт, Замын- Үүдийн чөлөөт бүсэд Хятадын талаас хөрөнгө оруулах явцыг дэмжих Ажлын хэсгийг тус тус байгуулан ажиллах, Замын-Үүд, Эрээн хотын хооронд Хятадын талын тусламжаар 1.1 км урт авто зам барихаар тохиров.

Цаашид Монгол Улсын Гадаад харилцааны яам, БНХАУ-ын ӨМӨЗО-ны Ардын засгийн газар хоорондын хамтын ажиллагааны Байнгын зөвлөлдөх ажлын хэсгийн хуралдааныг жил бүр зохион байгуулж хоёр талын худалдаа, эдийн засаг болон харилцааны бусад салбарын хамтын ажиллагааны асуудлаар хэлцэж байхаар тохиров гэж Гадаад харилцааны яамны олон нийттэй харилцах газраас мэдээлэв.