Боловсролын салбар нь байнгын тордож, тойглож, салхи оруулж, шинэчилж онцгойлон анхаарах ёстой салбар. Гэсэн ч өнгөрсөн хугацаанд үүнийг орхигдуулсаар ирсний гор гарсан. Боловсролыг мөнгө олох бизнес болгоод удсан, түүнд ямар ч хяналт, шалгуур байгаагүйн нотолгоо бүхий олон үйл явдал өнгөрсөн хугацаанд болж өнгөрсөн. Тодруулбал, ХУУРАМЧ ДҮН, ХУЛХИ ДИПЛОМ, ХҮРТЭЭМЖГҮЙ ОЮУТНЫ ХӨГЖЛИЙН ЗЭЭЛИЙН САН гэх мэтчилэнг дурдаж болно. 

Улс төрд нөлөө бүхий, мэдээлэлд ойр байдаг хүмүүс залуусын боломжийг хулгайлсан буюу Боловсролын зээлийн сан /БЗС/-аас зээл аваад гэрээний үүргээ биелүүлээгүй иргэдийг олон нийтэд зарласан. Үүнтэй холбогдуулан тэтгэлэг, зээл авсан нийт иргэдийн мэдээллийг цахим хуудсанд ил байршуулж, зээлийг эргэн төлүүлэхээр хууль, хяналтын байгууллагад шилжүүлсэн. 

Боловсрол, соёл, шинжлэх ухаан, спортын байнгын хорооны /2024-08-29/-ний өдрийн хуралдааны үеэр УИХ-ын гишүүн О.Батнайрамдал БЗС-ийн асуудалтай холбогдуулан “Сүүлийн 10 жил аудитын дүгнэлт дээр хамгийн их асуудалтай гарч байсан нь Боловсролын зээлийн сан. Энэ удаагийн аудитын дүгнэлт дээр гарсан 120 тэрбум гаруй төгрөгийн авлага буюу зөрчлийг яах вэ. Энэ мөнгөний хөөн хэлэлцэх хугацаа дуусах, найдваргүй болох эрсдэлтэй гэсэн байна!” гэв. 

Боловсролын сайд П.Наранбаяр хэлэхдээ, "Тухайн үед БЗС-аар суралцаад улмаар сурч мэдсэн зүйлээ ашиглаад төрд ажилласан буюу 2012 он хүртэлх журмынхаа дагуу 5 жил ажиллаад зээлээ тэглэсэн хүмүүс их бий. Жишээ татвал Сангийн яам байна. Тус сангийн зорилго нь ирээдүй хойч үедээ дэлхийг үзүүлж эргээд тэндээс сурсан мэдлэг болосвролыг нь эх орондоо ашиглах юм. Бид энэхүү зорилгоосоо гажихгүй цааш алхана. Буцаах болон чөлөөлөх бодлогыг нарийвчлах ёстой. Хэн ч ойлгомжтой болгох ёстой. нэг ёсондоо, боловсролын зээлийн сангаас зээл олгох процесс дахь хүний хамаарлыг эрс бууруулж, олон нийтэд ил тод болгох бодлого баримталж байна. Зээл олгоход ч, зээлийг буцаахад ч дүрэм журмыг хатуу баримталж, зээлд хамрагдсан иргэдээс хариуцлага, үр дүнг шаардана. Хээрийн галуу нисэн үл хүрэх газраас, Хүний хүү эрдэм өвөрлөн ирлээ хэмээн Монголчууд ярьдаг. Эрдэм өвөрлөн ирсэн залуу хүн бүрийг үгүйсгэх бодлого баримтлахгүй. Үүнийг хариуцлагатай хэлэх хэрэгтэй" гэв. 

Дашрамд, Боловсролын зээлийн сангийн ажлын албаны даргаар О.Сийлэгмааг томилов. Ингэхдээ боловсролын зээлийн санг илүү ил тод болгож, хүнээс хамаарсан байдлыг бууруулахыг даалгасан юм. О.Сийлэгмаа нь боловсролын зээлийн сангийн асуудлаар нийгэмд шүгэл үлээсэн хүн билээ.

Сэтгүүлч

Сэтгүүлч Б.Хонгорсайхан