УИХ дахь МАН-ын бүлгээс 7 хоног бүрийн лхагва гарагт зохион байгуулдаг "МОРИН ЦАГ' мэдээллийн цагт УИХ-ын гишүүн, ЭЗБХ-ны дарга Ж.Батсуурь оролцлоо.

Тэрээр эдийн засаг тун хүндхэн байгаа энэ үед баялаг бүтээгчдийг дэмжсэн бодлого хэрэгжүүлж байж хямралаас гарна гэж үззж байгаагаа мэдэгдсэн юм.  Тиймээс ийм тохиолдолд эдийн засгаа яаж авч явах вэ гэдэг нь төрийн тусгайлсан бодлого шаардаж байгааг тэрээр тодотголоо.

Өнөөдөр манай улсад 54 мянга гаруй ААН үйл ажиллагаа явуулж байгаагийн 80 гаруй хувь нь жижиг дунд үйлдвэрийн ангилал зэрэглэлд багтаж байна. Тиймээс жижиг дунд үйлдвэрийг хөгжүүлэх тууштай зөв бодлого хэрэгтэй.

Өнгөрсөн хугацаанд хэдхэн том орд газрыг түшиглээд, зөвхөн том төслүүд рүү хамаг анхаарлаа хандуулаад жижиг дунд үйлдвэрлэлийг орхигдуулсан, уул уурхайн бүтээгдэхүүний үнийн прогнозыг зөв тодорхойлж чадаагүй, 2013 оноос эхлээд эдийн засгийн дохиог зөв ойлгож хүлээн авахгүй, баялаг бүтээгчдийг дэмжих нэртэй бодлогоо зөв тодорхойлоогүй зэрэг нь эдийн засгийн өнөөгийн хүндрэлд хүргэсэн гэж тэрээр үзэж байна. Бодлого зөв бол боломж шавхагддаггүй гэсэн эдийн засгийн суурь ойлголтод тулгуурлаж баялаг бүтээгчдээ дэмжих ёстой.

УИХ-ын гишүүн, ЭЗБХ-ны дарга Ж.Батсуурь

Аж үйлдвэрийн яам байгуулагдаж, Аж үйлдвэрийн талаар баримтлах төрийн бодлоготой болсон ч хэрэгжүүлэх үйл явц нь буруу тийш эргэсэн нь олон ААН үүд хаалгаа барьж, ажлын байр хумигдахад нөлөөлсөн гэдгийг ч тэмдэглэлээ.

Тиймээс баялаг бүтээгчдийг дзмжих бодлогын хүрээнд 1-рт зах зээлээ хамгаалах бодлого хэрэгжүүлэх, хууль эрх зүйн орчинг бүрдүүлэх, 2-рт татварын тогтвортой орчин бий болгох, татвар гаалийн хуулиудад үзэл баримтлалын шинж чанартай томоохон өөрчлөлт хийх, 3-рт санхүүгийн тайлан болон мэдээллийн системийг баялаг бүтээгчдэд ээлтэйгээр сайжруулах нь зүйтэй гэсэн байр суурьтай байгаагаа илэрхийллээ.