Улсын бүртгэлийн ерөнхий газар иргэний цахим үнэмлэх хэвлэх программаа суулгаж дуусчээ. Үүнийг Засгийн газарт танилцуулсны дараа олон нийтэд тараах өдрийг мэдэгдэх гэнэ.

Цахим үнэмлэхийг 484 нэгжээр дамжуулан ирэх дөрөвдүгээр сард багтаан 16-гаас дээш насны иргэн бүрт хүргэх аж. Эхний ээлжинд хүн амын хөдөлгөөн багатай, тогтвор суурьшилтай, иргэдийнх нь мэдээлэл цэгцэрсэн дүүргээс эхлэн туршилтын журмаар олгох юм байна.

Нийслэл болон хөдөө орон нутгийн иргэд цахим үнэмлэх авахдаа иргэний үнэмлэхээ харьяа хороондоо авч очоод шинэ үнэмлэхээ авах боломжтой гэнэ. Харин хуучин үнэмлэхээ Улсын бүртгэлийн ерөнхий газарт хураалгах юм.Цахим үнэмлэхийг 10 жилд солихгүй хэрэглэж болно.

Учир нь иргэний цахим үнэмлэхийн их биеийг поликарбонатаар хийх ба уг материалыг гадны орнууд сум нэвтэрдэггүй шил, нисэх онгоцны их бие үйлдвэрлэхэд ашигладаг юм байна.Манай улсын хоёр сая гаруй иргэний цахим үнэмлэхийг 45 хоногийн дотор үйлдвэрлэж гаргах боломжтой гэнэ.