ХББОС-ын сайд Ж.Батсуурь өчигдөр /2025.04.08/-нд Европын хөрөнгө оруулалтын банкны Ази, Номхон далайн салбарын захирал Ноён Эдвардс Бумштейнас болон Европын Холбооны элчин сайд Марчюлёните нарыг хүлээн авч уулзлаа.

Европын хөрөнгө оруулалтын банк нь Европын холбооны гишүүний орнуудын төслийг дэмжих, хөгжүүлэх, санхүүжүүлэх зорилготой үйл ажиллагаа явуулдаг бөгөөд Монгол Улсад хамгийн сүүлд эхлүүлсэн төслийн нэг нь аймаг, сумдын бүсчилсэн ногоон хөгжлийн хөрөнгө оруулалтын хөтөлбөр юм.

Уулзалтад ХББОСЯ-ны СХОБЗГ-ын дарга Адъяабаатар, ХББОСЯ-ны ХББЗГ-ын дарга Ц.Баярбат, “Хүннү хот”-ын дарга н.Батбаяр, Хүннү хотын хөгжлийн корпорацийн гүйцэтгэх захирал Б.Гүнболд, ХББОСЯ-ын ГХАХ-ийн дарга Б.Анх-Оргил, ХББОСЯ-ны ГХАХ-ийн ахлах мэргэжилтэн Э.Нандинбилэг, ЕХОБ-ны Ази, Номхон далайн салбарын захирал Ноён Эдвардс Бумштейнас, Европын Холбооны Элчин сайд Марчюлёните, ЕХОБ-ны Хятад, Монгол дахь төлөөлөгчийн газрын дарга Ноён Ауво Кайкканен, ЕХОБ-ын төвийн ахлах ажилтан Жан-Филлип Стийн, Хөтөлбөрийн менежер Арнауд Африу нар оролцож, Европын банкны зээл, хөрөнгө оруулалт, Нисэх онгоцны буудлыг түшиглэсэн Хүннү хотын бүтээн байгуулалтын талаар хэлэлцэв.

Монгол Улсын нийт хүн амын 50 хувь нь нийслэлд амьдардаг учраас хүн амын төвлөрөл ихэсэж, агаар, хөрсний бохирдол хүндрэл учруулах болсон. Цаашид хөдөө орон нутагаас Улаанбаатар хот руу чиглэх шилжилт хөдөлгөөнийг зогсоож, нийслэлээс орон нутагт суурших төлөвлөгөө гарган ажиллаж байна.Улаанбаатар хотыг тэлж дагуул хотуудыг байгуулахаар санхүүгийн бэрхшээл тулгардаг талаар танилцуулав.

Хүннү хот нь Монгол Улсын нийслэл Улаанбаатар хотын дагуул хотын хувьд нийт хүн амын дийлэнх хэсгийн амьдрах, оршин суух нөхцөлийг бүрдүүлж, Улаанбаатар хотын ачаалал, төвлөрлийг задлах, суурьшлыг тэнцвэржүүлэх, зам тээвэр ложистикийн үйлчилгээг бий болгох, дэд бүтцийн хангамж, хүртээмжийг нэмэгдүүлэх замаар эдийн засгийн бие даасан байдлыг хангах, байгаль орчинд ээлтэй, хүний аюулгүй байдал, амгалан амьдрах боломжийг бүрдүүлсэн тогтвортой хөгжлийн загварыг бий болгох буюу улс орны эдийн засгийн аюулгүй байдлыг хангахад чиглэх юм.

Төсөл хөтөлбөр хэрэгжсэнээр:

• Уур амьсгалын өөрчлөлтөд дасан зохицсон, нүүрстөрөгч багатай, өсөлтийн төв бүхий аймаг, сумын төвийг хөгжүүлэх;
• Уур амьсгалын өөрчлөлтөд дасан зохицсон, тогтвортой бэлчээрийн менежментийг хэрэгжүүлнэ;
• Нүүрстөрөгч багатай, уур амьсгалын өөрчлөлтөд дасан зохицсон МАА-н өртгийн сүлжээг хөгжүүлж, хүртээмжтэй санхүүжилтийг бэхжүүлнэ;
• Нүүрстөрөгч багатай, уур амьсгалын өөрчлөлтөд дасан зохицсон хөдөө аж ахуйн нутаг дэвсгэрийн институтийн чадавх, бодлогын хүртээмжийг нэмэгдүүлнэ;