2024.09.12

М.Энхцэцэг гишүүнээр ахлуулсан ажлын хэсэг эрчим хүчний эрх зүйн шинэчлэл хийнэ

Улсын Их Хурлын 2024 оны ээлжит сонгуулийн дүнгээр байгуулагдсан нийгмийн олон бүлгийн төлөөлөл бүхий 126 гишүүнтэй шинэ парламентын өмнө хууль эрх зүйн орчныг шинэ цагийн хэрэгцээ, шаардлагад нийцүүлэн төгөлдөржүүлэх өндөр хариуцлагатай, өргөн цар хүрээтэй үйл хэрэг хүлээгдэж байгааг Улсын Их Хурлын дарга ээлжит бус чуулганыг нээж хэлсэн үгэндээ онцолсон билээ.

Шинэ парламент хууль тогтоох үйл ажиллагаандаа дараах үндсэн чиглэлийг баримтлан ажиллана хэмээн УИХ-ын дарга тодотгосон. Хууль, эрх зүйн орчны Гурван төгөлдөржил нь нэгдүгээрт, хүний эрхийг дээдэлсэн, хүн төвтэй хуулийн үзэл баримтлалд тулгуурласан эрх зүйн тогтолцоог бүрдүүлэх, хоёрдугаарт, Хууль тогтоомжийг тодорхой ойлгомжтой болгож, хууль хүн бүрд ижил тэгш үйлчилдэг болгох, гуравдугаарт, Нийгмийн хурдацтай хөгжлийн шаардлагад нийцүүлэн, эрх зүйн зохицуулалтыг цаг алдалгүй гаргадаг болгох үйл ажиллагаа юм. Энэ хүрээнд Улсын Их Хурлын гишүүдээс санал авсны үндсэн дээр Улсын Их Хурлын даргын захирамжаар холбогдох хууль, эрх зүйн орчныг боловсронгуй болгох, хэрэгжилтийг нь эрчимжүүлэх чиглэлээр санал боловсруулах үүрэг бүхий Ажлын хэсгүүд байгуулагдаад байна.

УИХ-ын гишүүн М.Энхцэцэг, Эрчим хүчний салбарын шинэтгэлийн хүрээнд Эрчим хүчний тухай, Сэргээгдэх эрчим хүчний тухай, Эрчим хүч хэмнэлтийн тухай хууль болон холбогдох хууль тогтоомжийг шинэчлэн боловсруулах үүрэг бүхий ажлын хэсгийг ахалч ажиллахаар болжээ. 

Ажлын хэсэгт Ч.Анар, Б.Жаргалан, Б.Найдалаа, С.Цэнгүүн, Д.Энхтуяа зэрэг гишүүд ажиллах бөгөөд манай улсын хамгийн их "гал алдах" эрсдэлтэй байгаа салбарын эрх зүйн орчныг гардан авч ажиллах гэж байгаа М.Энхцэцэг гишүүний ахалсан энэ ажлын хэсэгт олон хүн, тэр дундаа эрчим хүчний салбарынхан ихэд итгэл хүлээлгэж байна. 

Сэтгүүлч

Редактор Ц.Соёлмаа soko@vip76.mn