МҮЭ-ийн холбооны дэргэдэх Залуучуудын хорооны бүх гишүүдийн хурал ХБНГУ-ын ФЭС-гийн дэмжлэгтэйгээр Blue Sky Зочид буудлын Diamond танхимд болж, өнгөрсөн 5 жилийн тайлан, тус хорооны бүтэц зохион байгуулалт, МҮЭ-ийн холбооны дүрмийн шинэчлэлийн асуудлыг хэлэлцлээ.

Хурлын эхэнд МҮЭ-ийн холбооны Ерөнхийлөгч С.Эрдэнэбат, Э.Тамир нар нээлтийн үг хэлж, ҮЭ-ийн байгууллагын залуучуудын хүлээсэн үүрэг, хөдөлмөр эрхэлж буй залуусын хөдөлмөрийн хүрээний тулгамдсан олон асуудлыг шийдвэрлэж ажиллахад залуучуудын манлайлал ус агаар мэт хэрэгтэй байгааг онцолж,  “МҮЭ-ийн холбооны дүрмийн төслийн танилцуулга”,  ХБНГУ-ын ФЭС-гийн суурин төлөөлөгч Бенедект Ивановс “Германы ҮЭ-ийн байгууллагын залуусын эв нэгдэл үйл ажиллагаа”, Залуучуудын хорооны “таван жилийн тайлан” илтгэлийг тус тус танилцуулав.

Үргэлжлүүлэн хурлын төлөөлөгчид багт хуваагдан МҮЭ-ийн холбооны дүрмийн шинэчилсэн найруулгад зүйл заалт бүрээр хэлэлцэж саналаа бэлтгэлээ. Энэ удаагийн хурлын зорилго нь МҮЭ-ийн холбооны дүрмийн шинэчлэлтэй холбоотой залуучуудын байр суурийг нэгтгэн дүрмийн ажлын хэсэгт хүргүүлэх, Залуучуудын хорооны дарга Э.Тамир өөрийн хүсэлтээр хүлээлгэн өгч байгаатай холбоотой тус хорооны 2017-2022 оны үйл ажиллагааны тайланг хэлэлцүүлж, бүтэц зохион байгуулалтын асуудал хэлэлцэх, дарга тэргүүлэгчдийг нөхөн сонгоход оршиж байсан юм.

Хурлын төгсөлд Залуучуудын хорооны бүтэц зохион байгуулалтыг хэлэлцэх үеэр сонгуулийн комиссын тайланд Залуучуудын хорооны даргад нэрээ дэвшүүлсэн Б.Галбадрах, Т.Солонго нар өрсөлдөж мандатын эрхтэй 64 төлөөлөгчдийн дунд нууцаар санал хураалт явуулахад Б.Галбадрах 47 хүн буюу 74,3 хувь, Т.Солонго 17 хүн буюу 26,5 хувийн саналыг тус тус авч МҮЭ-ийн холбооны дэргэдэх Залуучуудын хорооны даргаар Б.Галдбадрах сонгогдлоо. Энэ үеэр шинээр сонгогдсон дарга тэргүүлэгчдийн баг бүрэлдэхүүнээ өөрөө дэвшүүллээ.