Улс­төрчид бие бие­дээ этгээд, содон бэлэг өгөх нь бий. Өнгөрсөн оны 11 дүгээр сард АНУ-ын Ерөн­хийлөгч Барак Обама Авст­ралид айлчлахдаа өвөр­мөц даатгалын гэрээ бэл­гэнд авчээ.

Уг даатгалын нөхцөлийн дагуу хэрэв АНУ-ын Ерөнхийлөгч рүү матар дайрвал гэргий Мишель нь 50 мянган доллар авах юм байна. Обама “Бид эрүүлийг хамгаалах салбарт өөрчлөлт хийж байхдаа иймэрхүү даатгалын талаар огт бодсонгүй шүү” хэмээн хошигножээ.

Барак Обамаг Польшид айлчлахад тус улсын Ерөнхий сайд Дональд Туск өвөрмөц бэлэг өгсөн байна. “Шулам 2: Хаадын алуурчид” гэсэн энэ тоглоомыг хараад Обама арай гэж биеэ барин, эелдэг харагдахыг оролдсон гэдэг.

Харин Обама өөрөө бэлэг сонгохдоо тун тааруу. Тэрбээр 2009 оны дөрөвдүгээр сард Их Британийн хатан хаан II Элизабетад Бродвейн аялгуу бүхий “iPod” бэлэглэжээ. Гэхдээ энэ нь өмнөхөөс дэвшилттэй байсан. Учир нь өмнө нь Их Бри­танийн Ерөнхий сайд Гордон Браунд бэлэглэсэн Обамагийн “DVD” хуурцаг эвдэрхий бай­жээ.

Америкчууд 2009 онд ОХУ-тай харилцаагаа сайж­руулахын тулд Гадаад харил­цааны сайд Сергей Лавровт “дахин ачаалах” гэсэн утгатай улаан товчлуур бэлэглэхээр шийджээ. АНУ-ын Төрийн нарийн бичгийн дарга Хиллари Клинтон “Бид оросоор зөв илэрхийлэх гэж тохирох үгийг их удаан хай­сан. Хэр болж вэ?” гэж Лав­ровоос асуув. Лавров “Тийм ч тохиромжтой биш” гэж хариулав. Яагаад гэ­вэл улаан товчлуур дээр “хэт ачаалал” гэж бичсэн байжээ.

Бүх цаг үеийн хамгийн хачин дипломат бэлэг бол Иракийн Ерөнхийлөгч Саддам Хусейны 1983 онд НАТО-гийн тэргүүн Дональд Рамсфельдэд өгсөн бичлэг. Рамсфельдийг Ирак улсад айлчлан ирэхэд Саддам гурван минутын видео бичлэг бэлэглэжээ. Түүн дээр Сирийн залуус могойн толгойг тас хазаж, нохойн гөлгүүдийг хутгаар хэрчиж байхад цаана нь Сирийн дарангуйлагч Хафез аль Асад алга ташиж байлаа. Энэ бэлэг ямар далд агуулгатайг До­нальд Рамсфельд таа­вар­лаж ядсан гэдэг.

1977 онд Фиджийн омог аймгийн удирдагчид Бүгд найрам­дах улс болж бай­гаа­даа уучлал гуйн, Их Бри­­танийн хатан хаанд халим­ны шүд бэлэглэжээ. Ийм шүдийг “табуа” гэж нэр­лэдэг бөгөөд Фиджид алт шиг үнэлэгддэг аж.

Харин Номхон далайн өмнөдөд оршдог арлууд дээр амьдардаг Тан улсын иргэд Их Британийн хатан хааны нөхөр герцог Эдинбургийг бурханчлан шүтдэг. Тэд 2010 онд тус арлын эрчүүдийн уламж­лалт хэрэглээ болох бэлэг эрхтний сүрлэн савыг түүнд бэлэглэхээр шийджээ. Харам­салтай нь герцог ийшээ ирж, эрхтнийхээ хэм­жээг өгөхийг хүсээгүй тул англи хэлний багш, англи залуугаас үлгэр загвар авсан гэдэг.

Дипломатчдын бие бие­дээ бэлэглэх дуртай бэлэг бол амьтан. Францын мар­киз де Лафайетт XIX зуунд Аме­рикийн Ерөнхийлөгч Жон Куинсид матар бэлэг­лэжээ. Куинсид тэр матраа Цагаан ордны угаалгын өрөөнд тэжээж байжээ. Европод анааш анх 300 гаруй жилийн өмнө бий болсон нь мөн л дипломатчдын бэлэг. Египетийн тэргүүн Мухаммад Али Францын хаан X Карлд анааш бэлэглэжээ. Түүнийг үзэхээр 1826 онд 100 мянга гаруй хүн Парисын Жарден де Плант паркад очсон бай­на.

Брунейн султан 2004 онд АНУ-ын Ерөнхийлөгч Жорж Бушид “Хэрхэн амьд га­рах вэ?” гэдэг нэртэй ном бэлэг­лэжээ. Ер нь тэр жил Буш олон хачин бэлэг авсан. Иорданийн хаан Абдулла түүнд зургаан лааз бордоо бэлэг­лэсэн юм.

Их Британийн төр засаг төсвөө үнэхээр танаж эхэл­жээ. Гадаад харилцааны сайд Уильям Хейг 2011 оны 11 дүгээр сард Австралийн Ерөнхий сайд асан Кевин Раддад лаазтай галууны тос бэлэглэсэн. Тэрбээр ханиадтай мистер Раддыг англичуудын уламж­лалт аргаар галууны тос, зөгийн бал,халуун усаар эмч­лэхийг хүссэн бололтой.

Дипломатчид дайн даж­наас сэргийлэхийн тулд бүхий л аргыг хэрэглэдэг. Үүний нэг нь бяслаг гэвэл та ит­гэх үү. Хэдэн зуун жилийн өмнө пармезан сортын бяслаг асар өндөр үнэтэй байсан. Иймээс дипломатчид хол­боот­нуудаа өөртөө та­тахын тулд энэ бяслагийг бэлэг­лэж байв. Жишээлбэл 1502 онд Венецийн Элчин сайд Бенедетто Санудо ийм бяслагийг Александрын эмирт бэлэглэжээ.