Улсын Их Хурлын гишүүн Д.Эрдэнэбатаас Монгол Улсын Ерөнхий сайдад тавьсан Ханшийн өсөлттэй холбогдуулж хийсэн интервенци, мөнгөний болон төсвийн бодлогын уялдаа, Засгийн газрын өрийн талаарх асуулгын хариуг сонслоо. Асуулгатай холбоотойгоор УИХ-ын гишүүд асуулт асууж, санал хэллээ.

УИХ-ын гишүүн Б.Баттөмөр:

“7,2 их наяд төгрөгийг хэвлээд зах зээлд нийлүүлчихдэг. Тэр мөнгөний ихэнх нь ам.доллар болдог. Ингээд долларын эрэлт нэмэгддэг. Өнгөрсөн 4 жилийн хугацаанд үүссэн өр өнөөдөр бидэнд өвлөгдөөд явж байгаа. ОУВС-ийн аргачлал, Монголбанкны аргачлал зөрдөг. ОУВС-ийн аргачлалаар бодвол валютын нөөц сөрөг дүнтэй гарна. Своп хэлцлээс Монголбанк их алдагдал хүлээж байгаа. Үүнийгээ яаж нөхөж байгаа вэ?

Валютын ханшийг Монголбанк хариуцдаг л гээд ойлгоод явдаг. Яг үнэндээ Засгийн газар төгрөгийн ханшийг тогтвортой байлгах ёстой. Бид буруу шийдвэр гаргаад, улс төржөөд яваад байвал төгрөгийн ханш унасаар л байна. Тиймээс зөв бодлогоор удирдах шаардлага байна.

Арилжааны банкууд хадгаламжаа валютынх болгож байгаа тухай мэдээлэл байна. Үүнийг яаж тэнцвэржүүлэх вэ?”

Түүний асуултанд Сангийн сайд Ч.Хүрэлбаатар, Монголбанкны Дэд Ерөнхийлөгч Б.Лхагвасүрэн нар хариуллаа.