Улсын хэмжээнд 18 аймгийн 97 сум цагаан зудтай, 20 аймгийн 111 сум зудархуу байдалтай байгаа талаар холбогдох газруудаас олон нийтэд мэдээлэх болсон.

Мөн малчдад туслах сайн санааны хандивын арга хэмжээг иргэд, аж ахуйн нэгж байгууллагын хүрээнд өрнүүлэх болсон билээ. Нийслэлийн МАН-ын хорооноос өвөлжилт хүндэрсэн аймгуудын малчдад дэмжлэг үзүүлэхээр сайн үйлсийн аян зарлаж буй талаараа өнгөрсөн долоо хоногт мэдэгдсэн юм.

Зовох цагт нөхрийн чанар танигддагийн адилаар тэд Улаанбаатар хот дахь нутгийн зөвлөлүүд, аж ахуйн нэгж байгууллага, иргэд, олон нийтэд хандан уриалга гаргажээ. Үүнтэй холбогдуулан нийслэлийн МАН-ын хорооны дарга Ц.Сандуй, тэргүүлэгчид болон дүүргүүдийн намын хорооны дарга нар өчигдөр Онцгой байдлын ерөнхий газрын дарга, бригадын генерал Т.Бадралтай уулзан уриалгаа гардуулан өглөө.

Уулзалтын үеэр малчдад туслах энэхүү уриалгыг нийслэлийн иргэд, аж ахуйн нэгж байгууллага, олон нийтийн байгууллагуудын дунд өрнүүлж хамтран ажиллан дэмжлэг үзүүлэх хүсэлтийг ОБЕГ-ын дарга, бригадын генерал Т.Бадралд тавьсан юм.