Монгол Улсын Ерөнхийлөгчийн сонгуульд Ардчилсан намаас нэр дэвшигч Ц.Элбэгдорж өнөөдөр үдээс өмнө Сэлэнгэ аймгийн Баянгол суманд, үдээс хойш Мандал суманд тус бүр ажиллаж иргэд сонгогчидтойгоо уулзан мөрийн хөтөлбөрөө танилцууллаа.

Мөн Монгол Улсын Ерөнхийлөгчийн алба хашсан өнгөрсөн дөрвөн жилийн хугацаанд хийсэн ажлаа тайлагнасны зэрэгцээ Монгол Улс дэлхийн хоёр том гүрний дунд оршиж байгааг онцлоод тэдгээрийг холбох гүүр нь Сэлэнгэ, Дорноговь аймаг болж буйг тэмдэглэлээ.

Монгол Улсын Засгийн газраас эл онцлог байдлыг хөгжил болгон хувиргахын тулд Алтанбулаг-Замын-Үүд сумдыг холбосон хатуу хучилттай авто зам тавихаар төлөвлөсөн байна. Авто зам ашиглалтад орсноор Замын-Үүд сумаас Алтанбулаг хүртэлх авто замын тээвэрлэлт саадгүй болно.

Дээр нь төмөр замаа шинэчилснээр Монгол Улс хоёр хөршийнхөө гарц нь болно. Энэ нь эргээд улсынхаа хөгжлийг урагшлуулж эдийн засгийн өсөлтөө хангах боломжийг нээнэ.

Монгол Улсын Ерөнхийлөгч энэ тухай тодотгохдоо “Хойд хөрш газар нутгийнхаа хэмжээгээр дэлхийд нэгдүгээрт бичигддэг бол өмнөд хөрш хүн амынхаа тоогоор дэлхийд тэргүүлдэг. Мөн Хятад улсын бараа бүтээгдэхүүн дэлхийн зах зээлд тэргүүлэх болсон. 

Засгийн газраас ирэх намраас эхлэн хүнсний ногоог Улаанбаатар хотын хүнсний захуудаар борлуулахад анхаарахаар болсон.

Гэхдээ өмнөд хөрш нь бараа бүтээгдэхүүнээ Европын зах зээлд гаргахын тулд далайгаар тээвэрлэлт хийхэд хоёр сарыг зарцуулдаг. Хэрвээ Монгол Улсын нутаг дэвсгэрээр төмөр замаар дамжуулан тээвэрлэлт хийж Европ руу гаргавал ердөө хоёр долоо хоног л зарцуулна. Газар нутгийн ашигтай байрлалаа Монгол Улс ашиглаж төмөр замын тээвэрлэлтээ өргөжүүлэх шаардлагатай байгаа юм.

Үүний тулд Монгол Улс одоо төмөр замаа шинэчлэх, орон сууцаа барих, эрчим хүч гадаадаас царайчлахгүй болохын тулд Дулааны тавдугаар цахилгаан станцыг барих, УИХ, Засгийн газрын бодлого шийдвэрийг дэмжиж ажиллаж чадах Ерөнхийлөгч сонгогдох ёстой.

Сонгогч та бүхний хувьд гурван нэр дэвшигчээс хэнийг дэмжих нь өөрсдийн тань эрх. Гол нь улсын хөгжлийг урагшлуулах, хөгжилд чөдөр тушаа болох ёсгүй төрийн тэргүүн сонгогдох нь чухал шүү” гэж  онцолсон юм.

Ц.Элбэгдорж: Гол нь улсын хөгжлийг урагшлуулах, хөгжилд чөдөр тушаа болох ёсгүй төрийн тэргүүн сонгогдох нь чухал.

Сэлэнгэ аймгийн Баянгол, Мандал сумдын хувьд Монголын төмөр замын гол зангилаа бүсэд тооцогдож байна. Төмөр замаа дагаад хүн амынх нь суурьшил бусад сумдтай харьцуулахад өндөр аж. Тухайлбал, Мандал сум 26 мянган хүн амтай юм байна. Гэхдээ орон нутгийг хөгжүүлэх зориулалтаар 600 сая төгрөг төсвөөс хуваарилагджээ.

Энэ асуудалд Монгол Улсын Ерөнхийлөгч Ц.Элбэгдорж байр сууриа илэрхийлсэн юм. Тэрээр “26 мянган хүн амтай Мандал суманд 600 сая төгрөг бус зургаан тэрбум төгрөг хуваарилагдах ёстой. Ирэх жил УИХ-аас хөрөнгө оруулалтыг хуваарилахдаа сум, баг гэдгээр харах биш хүн амынх нь тоог харгалзан үзэж хуваарилалт хийнэ гэж найдаж байна” гэлээ.

Сэлэнгэ аймгийн хувьд Монгол Улсын газар тариалангийн гол бүс нутаг байсаар ирсэн. Тэр хэрээр хүнсний ногооны тариалалт ч сүүлийн жилүүдэд эрс өссөн. Гэхдээ ногоочдын хувьд тарьж ургуулсан ногоогоо борлуулах нь амаргүй ажлын нэг болж хувирчээ.

Хэрэглэгчдийн хувьд чанартай хүнс хэрэглэх ёстой атал үнэ хямдыг нь харж өмнөд хөршөөс импортолсон чанаргүй ногоог түлхүү худалдан авдаг нь дотоодын хүнсний ногооны борлуулалтад нь сөргөөр нөлөөлдөг байна.

Нөгөөтэйгүүр, борлуулах сүлжээ бүрдээгүй нь олон сарын ажил болж хураан авсан ногоогоо хэдэн тонноор нь муутгаж илжрүүлэхэд хүргэдэг гэнэ. Тиймээс Засгийн газраас ирэх намраас эхлэн хүнсний ногоог Улаанбаатар хотын хүнсний захуудаар борлуулахад анхаарахаар болсон аж.

Р.Гончигдорж: Ерөнхийлөгчийн сонгууль бол Монголын ард түмний хаан сонголт.

Иймд ногоочдыг тарьсан ногоогоо хаана яаж борлуулах вэ гэдэгт санаа зовнихооргүй болж байгааг төрийн тэргүүн мөн энэ үеэр санууллаа. Бас нэг захиас хэлсэн нь, архины хэрэглээ буурч байгаа учраас Мандал суман дахь спиртийн үйлдвэрлэлийн технологийг өөрчилж хүнсний бусад төрлийн бүтээгдэхүүн үйлдвэрлэх чиглэлээр хэтийн төлвийг харах нь чухал болохыг онцлов.

Ингэж чадвал мандалчууд мөн ажилтай үлдэнэ. Ер нь Сэлэнгэчүүдийн хувьд Дарханы төмөрлөгийн үйлдвэр, “Хөтөлийн цемент шохой” ХК ойрхон байршин байгаа нь барилгын үйлдвэрлэлийг хөгжүүлэх бололцоо бас бий аж. Монгол Улсын Ерөнхийлөгч Ц.Элбэгдоржийг дагалдан УИХ-ын дэд дарга Р.Гончигдорж, УИХ-ын гишүүн, Хууль зүйн сайд Х.Тэмүүжин нар ажиллаж байгаа юм.

Баянгол, Мандал сумын иргэдтэй хийсэн уулзалтын үеэр УИХ-ын дэд дарга Р.Гончигдорж “Ерөнхийлөгчийн сонгууль бол Монголын ард түмний хаан сонголт. Төрийн тэргүүн нь 2.8 сая хүүхэдтэй айлын эцгийн үүргийг хүлээдэг амаргүй алба. Ийм амаргүй албанд ард түмнээ хуваадаг бус эвлэрүүлдэг Ерөнхийлөгч сонгогдох ёстой. Та бүхэн сонголтоо зөв хийгээрэй” гэсэн юм.

УИХ-ын гишүүн, Хууль зүйн сайд Х.Тэмүүжин “Авлигатай тэмцэхэд хамгийн их нөмөр нөөлөг түшиг болж байгаа хүн бол Монгол Улсын Ерөнхийлөгч Ц.Элбэгдорж. Өнөөдөр авлигын том, том хэргүүд илэрч байгаа нь Ерөнхийлөгчийн авлигачидтай хийж буй тэмцлийн дүн. Та бүхэн арилжааны банкинд данстай бол түүнийгээ нэг шалгаад үзээрэй.

Х.Тэмүүжин: Авлигатай тэмцэхэд хамгийн их нөмөр нөөлөг түшиг болж буй хүн бол Ерөнхийлөгч Ц.Элбэгдорж.

Том авлигачид иргэдийн нээлгээд мартсан дансанд их хэмжээний мөнгийг түр байршуулаад буцаагаад авч байна. Магадгүй таны дансанд их хэмжээний мөнгө орж ирсэн байвал түүнийг айж эмээлгүй аваарай, асуудалд орохгүй. Авлигачид асуудалд орохгүйн тулд хууль бусаар олсон хөрөнгөө бусдын дансанд нууцаар байршуулж хэрэгт орохгүйг хичээж байна” гэв.

Иргэд, сонгогчид дор бүрнээ шуугилдаж “Банкин дахь дансаа нэг шалгаж үзэх минь. Юмыг яаж мэдэх вэ, тэрбум, тэрбумаар тоологдох их мөнгөний сураг дуулдах болсон учраас дансаа шалгах нь зөв юм байна. Авлигачидтай зүрхшээхгүй тэмцэж байгаа Ерөнхийлөгч Ц.Элбэгдоржийгоо дэмжинэ ээ” гэсээр энэхүү уулзалтыг өндөрлүүлсэн юм.

Ерөнхийлөгч Ц.Элбэгдорж дээрх уулзалтыг өндөрлүүлээд “Улаанбаатар төмөр зам” хувь нийлүүлсэн нийгэмлэгийн Зүүн хараа дахь зангилааны төмөр замчидтай уулзалт хийсэн юм. Ингэснээр Монгол Улсын Ерөнхийлөгчийн сонгуульд Ардчилсан намаас нэр дэвшигч Ц.Элбэгдоржийн орон нутгийн иргэд, сонгогчидтой хийж байгаа уулзалт үндсэндээ өндөрлөж, зөвхөн нийслэлчүүдтэй хийх уулзалт үлдэж байна.