Гадаад харилцааны сайд Б.Батцэцэг Кувейт Улсаас Монгол Улсад суугаа Элчин сайд Мухаммад Аль-Мутайриг эх орондоо бүрмөсөн буцахтай нь холбогдуулан хүлээн авч уулзав.

​Уулзалтын үеэр Гадаад харилцааны сайд Б.Батцэцэг Кувейт Улс нь Булангийн орнуудаас Монгол Улстай дипломат харилцаа тогтоосон анхны улс бөгөөд хоёр улсын харилцаа тогтвортой өргөжин хөгжиж байгааг тэмдэглээд цаашид худалдаа, эдийн засгийн хамтын ажиллагааг хөгжүүлэх, хамтарсан төсөл, хөтөлбөр хэрэгжүүлэхэд ач холбогдол өгч байгааг онцлов.

Мөн Элчин сайд Мухаммад Аль-Мутайри-г Монгол Улсад Элчин сайдаар ажиллах хугацаандаа хоёр улсын харилцааг хөгжүүлэхэд чухал хувь нэмэр оруулсныг тэмдэглэж, цаашдын ажил үйлсэд нь амжилт хүсэхийн зэрэгцээ Гадаад харилцааны яамны “Алтан Гэрэгэ”-г дурсгав.

Элчин сайд Мухаммад Аль-Мутайри албан үүргээ гүйцэтгэх хугацаанд Монгол Улсын засгийн газар, Гадаад харилцааны яам, бусад байгууллагууд төдийгүй Монголын ард түмний зүгээс байнга дэмжлэг үзүүлж байсанд талархал илэрхийлэв.