Эргэн санахад...

1992 он. Нэг өдөр ээж, дүү хоёртойгоо ажил дээрээ сууж байтал С.Зориг "Хүрч ирээд уулзаадахаач" гэж хүнээр хэлүүлжээ. Молор-Эрдэнэ ХХК-аа дөнгөж байгуулчихсан байсан үе л дээ.

Яваад очлоо. С.Зориг, Да.Ганболд, Ш.Алтангэрэл, Э.Бат-Үүл дөрөв тамхины утаа суунагласан өрөөнд их л нухацтай царай гаргачихсан сууж байна. Сайхан өтгөн байхуу цай хийж өгөхөөр нь уугаад сууж байтал С.Зориг:

"Эрдэнээ, Ганболд Хайлаастын 12-р тойрогт өрсөлдөх гэж байна, МАХН-ын дарга Гомбожавын Очирбаттай өрсөлдөх болчихлоо. Чи очиж тусал, сурталчилгаанд нь хамт яв" гэж байна.
"Тэгье ээ" л гэлээ.

Ингээд сурталчилгааны өдрүүд эхэллээ. Тэр үед машин байтугай гар утастай хүн ховор цаг, бид ч тэдний нэг... Өглөө эрт автобусанд чихэлдэж аваад л Хайлаастын эцэс рүү явна. Очоод удаагүй байтал Ганболд маань бас гутлан дээрээ хэдэн гутлын мөртэй, автобуснаас чихэлдсээр бууж ирнэ. Ингээд л Хайлаастын гудмаар "шороо манаргаад" алхаж өгнө дөө.

Тааралдсан хүмүүст "Намайг Ганболд гэдэг. Би танай 12-р тойрогт нэр дэвшиж байгаа" гэхээр нь би залгуулж аваад л нэр дэвшигчээ магтан таниулах ажлаа хийнэ. Тэгээд л алхаж байтал хажуугаар цагаан хоолой "орилуулсан" УАЗ-496 цонхоороо кино үйлдвэрийн 33мм-ийн хальсны камертай зураглаачийн толгой "шоволзуулсаар" хажуугаар давхиад өнгөрнө. Өнөө бид хоёрын өрсөлдөгч 70 жил төр барьсан намын дарга сурталчилгаагаа хийж яваа нь тэр...

Харин хааяа бид 2 дээр гадаадын хэдэн сэтгүүлчид "шавчихна". Бид 2 мундагтаа ч биш, шинэ тогтсон Ардчилалтай улсад том намын даргатай шинэ залуу үеийнхэн өрсөлдөж байгаа нь тэдэнд сонирхолтой байсан байх л даа. Нөгөө хэдээ дагуулаад л сүртэй хэдэн хүн явна. Тэгж явахад хүмүүс сонирхож ирээд бид хоёрт харин ч завшаантай.

Ингэж явсаар хүч тэнцвэргүй тулаанд гуравхан хувийн саналаар ялагдлаа. Намын даргыг "Арай л барсангүй дээ" гэж инээлдсээр энэ удаагийн сонгуулиа дуусгасан ч хэдхэн сарын дараа нөхөн сонгуулиар Ерөнхий сайд П.Жасрайтай Э.Бат-Үүл өрсөлдөхөд Ерөнхий менежерээр нь ажиллан ялалт байгуулж байв.

Эргээд бодоход миний улс төрийн амьдрал 70-80 жил төр барьсан намын лидерүүдтэй өрсөлдөн ялахдаа ялж, ялагдахдаа ялагдаж явсаар энэ хүрчээ.

Энэ тухай дараа өгүүлэх болно...