УИХ-ын чуулганы нэгдсэн хуралдаанаар Эрдэнэт үйлдвэр болон Монросцветмет ХХК-ийн талаар авах зарим арга хэмжээний тухай УИХ-ын тогтоолын төслийг нээлттэй хэлэлцэж байна. 

Хэлэлцүүлгийн үеэр УИХ-ын гишүүн Н.Учрал үг хэллээ. 

УИХ бүрэн эрхийнхээ хүрээнд ажлын хэсэг байгуулж, Хууль зүйн байнгын хорооноос тогтоолын төсөл боловсруулсан байна. Энэ тогтоолын агуулга бол маш тодорхой. ОХУ, Монгол Улсын Засгийн газар олон улсын гэрээ мөн юм уу? Мөн. Энэ бол олон улсын гэрээ. Тэгвэл Үндсэн хуулийн 25 дугаар зүйлд зааснаар УИХ бүрэн эрхийнхээ хүрээнд олон улсын гэрээг соёрхон батлах, цуцлах эрхтэй

Хэрэв олон улсын гэрээг батлах, цуцлах шаардлагатай бол УИХ-ын шийдвэрээр Засгийн газарт эрх олгодог. Ийм байхад өмнөх Засгийн газар эрх мэдлээ хэтрүүлсэн гэдэг нь уг тогтоолын төслөөр тодорхой болж байна. Өмнөх Засгийн газар эрх мэдлээ хэтрүүлэн ашигласан нь тогтоогдсон болохоор энэ асуудлыг хууль, хяналтын байгууллага үргэлжлүүлэн шалгах хэрэгтэй.

Эрдэнэт үйлдвэрийн 49 хувийг худалдан авсан асуудлыг Монгол Улс дотооддоо шийдэх ёстой. Энэ бол олон улсын шүүхээр хэлэлцэх маргаан биш.

Харин Засгийн газар давуу эрхээсээ татгалзахад хүрсэн Засгийн газрын 330 дугаар тоот тогтоолын нэгдүгээр заалтыг хүчингүй болгох асуудлыг ярьж байна. Хэрэв Эрдэнэт үйлдвэрийн 49 хувийг худалдан авсан эх үүсвэрүүдийг хууль бус гэж үзэж байгаа бол энэ асуудлыг мөн хууль, хяналтын байгууллагад хандан шалгуулах ёстой.

Байнгын хорооноос гаргасан тогтоол бол маш сайн тогтоолын төсөл. Уг тогтоолын төсөл батлагдсаны дараа бид тогтоолын хэрэгжилтэд хяналт тавих ёстой.

Ер нь залуу хүнийхээ хувьд Монгол Улсад хариуцлага алдагдсан байгаад харамсаж байна. Монголд маш олон залуу бизнес эрхэлж, хөдөлмөрлөж байгаа. Хувийн хэвшил, бизнес эрхлэгчдийг хэн ч буруутгахгүй. Гэхдээ санхүү, татварын Х тайлангаас 400 сая ам.долларыг олтлоо хөрөнгөжиж буй миний үеийн, надаас дүү буюу маш гайхалтай, Гиннесийн номонд бичигдэхээр амжилт үзүүлсэн Ц.Пүрэвтүвшин гэдэг хүнээс асуумаар байна.

Яаж 400 сая ам.доллартай болов? Монголчууд ариун цагаан хөдөлмөрөөрөө хөдөлмөрлөөд хөдөлмөрлөөд хэдэн үеэрээ олохгүй ийм их хэмжээний мөнгийг олохгүй. Өөрийн хэрэгжүүлээд байгаа энэ том инновациа гарааны компаниудад танилцуулж, хэрхэн тэрбумтан олсноо Жек Ма шиг ярих цаг болсон юм биш үү?

Бид эх орондоо сайн сайхан амьдармаар байна. Цаашид эх үүсвэрийг нь судлаад үнэхээр хууль бус мөнгө байвал Эрдэнэт үйлдвэрийн тодорхой хувийг хөрөнгийн зах зээлд хувьцаа хэлбэрээр арилжаалж, ард түмэндээ өгөх ёстой. Монголчууд баялагтаа эзэн суух цаг болсон.