Улсын төсвийн хөрөнгө оруулалтаар Орхон аймгийн Говил багийн замыг барьжээ.

Тус багийн хувьд Эрдэнэт хотын төвтэй холбох зам байнга асуудалтай байсан аж. 1985 онд баригдсан авто замыг засварлуулах хүсэлт гаргасан ч аймгийн төсөв хүндрэлтэй гэсэн шалтгаанаар хасагдсаар  иржээ. Тиймээс Говил багийн удирдлагууд аймгаасаа сонгогдсон УИХ-ын гишүүддээ хандсанаар 4 км гаруй хатуу хучилттай замын шинэчлэлийн зардлыг улсын төсөвт суулгаж өгчээ.

УИХ-ын гишүүн О.Содбилэг “Энэ зам Говил багийн хувьд онц хэрэгтэй  асуудлын нэг байсан. Өмнөх Засгийн газрын үед ч яригдан зураг төсөл нь хийгдсэн ажил өнөөдөр дуусах гэж байна. Энэ зам баригдсанаар Эрдэнэт хотын хамгийн алслагдсан багийг төвтэй холбох алхам болж байгаа” гэлээ.