Манай орны ихэнх нутгаар хэт халалтын улмаас ой, хээрийн түймрийн эрсдэл бүхий бүс нутгаар хуурайшилт нэн аюултай зэрэглэлд хүрч, төв, баруун зүгийн нутгаар зуншлага муу, гантай байна.

Монгол Улсын Шадар сайд, Улсын онцгой комиссын дарга У.Хүрэлсүхийн өгсөн үүрэг, тушаал, удирдамжийн дагуу Улсын Онцгой комиссын нарийн бичгийн дарга, онцгой байдлын хурандаа М.Энх-Амараар ахлуулсан ажлын хэсэг өнөөдөр төв, баруун зүгийн нутагт ажиллахаар явлаа.

Ажлын хэсэг Өвөрхангай, Баянхонгор, Говь-Алтай, Булган, Архангай, Төв, Орхон, Сэлэнгэ, Хөвсгөл аймагт ажиллах юм байна.

Манай орны ихэнх нутгаар өдөртөө хэт их халж байгаа нь аянга цахилгаан буух эрсдэлийг бүрдүүлж байна.

Ажлын хэсэг гангийн нөхцөл байдалтай газар дээр нь танилцан үнэлгээ хийх,  шаардлагатай арга хэмжээг газар дээр нь авч, шийдвэрлүүлэх, яаралтай тохиолдолд үүлэнд зориудаар нөлөөлж хур тунадас оруулах арга хэмжээ авах,  зайлшгүй тохиолдолд Улсын онцгой комисс, Засгийн газарт асуудлыг танилцуулж ажиллах юм.

2015 он гарсаар 3 аймгийн 5 суманд аянга буусны улмаас 1 иргэн түлэгдэж гэмтэн, 53 толгой мал хорогдсон байна.

Мөн цаашид 07, 08 дугаар сард өдрийн их халалтын улмаас аянга цахилгаантай аадар бороо, мөндөр орох, үер буух зэрэг ус, цаг агаарын аюулт болон гамшигт үзэгдэл ажиглагдаж болзошгүй талаар цаг уурын байгууллагаас анхааруулж байна.

2015 он гарсаар 4 аймгийн 8 суманд уруйн үер бууж 38 айл өрх, 4 аж ахуйн нэгж, байгууллага усанд автаж, 6913 толгой мал хорогдсон байна.