Бүртгэлийн тоо хязгаартай бөгөөд энэ удаад 10 мянган хүнийг бүртгэх аж. Бүртгүүлэгсэд 18-39 насны иргэд, өөрөөр хэлбэл 1972 оны наймдугаар сарын 27-ноос 1994 оны наймдугаар сарын 26-ны өдрийн хооронд төрсөн байх ёстой юм байна. Үүнээс гадна хорих ялтай эсвэл түүнээс илүү хүнд ялтай гэмт хэрэгт холбогдоогүй, Солонгос улсаас албадан гаргах буюу тус улсыг орхин явах захирамж гаргуулж байгаагүй, Монгол Улсаас гарах эрхээ хязгаарлуулаагүй, тус улсад хууль бусаар оршин сууж байгаагүй байх ажээ. Түүнчлэн БНСУ-ын ЭСЯ-нд виз мэдүүлээд татгалзсан хариу авч байгаагүй байхаас гадна эрүүл мэндийн хувьд өвчингүй, тодруулбал элэгний В, С вирус, сүрьеэ, бэлгийн замын халдварт өвчингүй байх хэрэгтэй гэнэ.

Бүртгүүлэхээр ирэхдээ иргэний үнэмлэхээ эх хувиар нь авчрахаас гадна хэрвээ та гадаад паспорттой байх юм бол давуу тал болно гэдгийг албаны хүн тодотгож байна. Гэхдээ гадаад паспорт болоод иргэний үнэмлэх нь хүчин төгөлдөр байх ёстой аж. Бүртгүүлсний дараагаар солонгос хэлний шалгалтыг наймдугаар сарын 25,26-ны өдрүүдэд хоёр шаттайгаар өгөх бөгөөд нэгдүгээр шат нь 10:30-11:40 цагт байх бол харин хоёрдугаар шат нь 15:00-16:10 цагт байх юм байна. Хэрвээ дээр дурдсан хугацаанд шалгалтандаа орж чадаагүй бол ямар нэгэн тайлбар нэхэлгүйгээр дараагийн шалгалтыг хүлээх хэрэгтэй гэнэ.

Өөрөөр хэлбэл шалгалтыг нөхөн авахгүй гэсэн үг юм байна. Харин шалгалт авах, дүнг гаргах ажлыг Солонгосын талаас томилогдсон шалгалтын комисс гүйцэтгэх бөгөөд 80-аас дээш оноо авсан иргэд дундаас хамгийн өндөр оноо авсан дарааллаар шалгаруулж, эхний 4900 шалгуулагчийг тэнцүүлээд аж үйлдвэрийн салбарт тэнцсэн иргэдээ ажиллуулах гэнэ. Шалгалтын дүн есдүгээр сарын долооны өдөр гарах Хөдөлмөрийн бирж болоод холбогдох газруудын вэбсайтад тавигдах ажээ. Нэг зүйлийг сануулахад солонгос хэлний шалгалтанд орохдоо шалгалтын хураамж 24 ам.долларыг "Хадгаламж банк"-нд хийсэн байх ёстой юм байна.