Чуулганы хуралдаан үргэлжилж байна. Хууль зүйн сайдыг огцруулах асуудалтай холбогдуулан гишүүд байр сууриа илэрхийлсээр байна. Хуралдааныг хаалттай явуулах санал гаргасан ч нэг гишүүний асуудал учраас хаах шаардлагагүй гэж үзлээ.

Мөн Г.Баярсайхан гишүүн “УИХ-ын гишүүн хүнээс гарамгүй ёсзүйгүй алдаа гаргалаа. Намайг “ал” хэмээн Хууль зүйн сайд хүний амнаас гарамгүй үг хэлж, хүчирхийлэлд уриаллаа. Та энэ үгнийхээ төлөө ёсзүйн хороонд дуудагдах ёстой юм биш үү” гэв. Хууль зүйн сайд “Би нэг тиймэрхүү утгатай үг хэлчихсэн юм. Гэхдээ хуулийг би бүгдийг нь мэднэ.

Хууль зөрчсөн ямар ч үйлдлийн эсрэг дуугарч чадна. Дуугаруулахгүй гэж байгаа бол намайг алах ёстой л болов уу гэж хэлсэн юм. Энэ үг буруу байдлаар ойлгогдсон бол уучлаарай. Би ямар нэг буруу бодол агуулаагүй” хэмээн буруугаа хүлээлээ. Харин Г.Баярсайхан гишүүн ёсзүйн хорооноос албан ёсоор уучлалт гуйж байна гэж ойлгож болох уу хэмээсэн. Мөн Н.Батбаяр гишүүн “Ц.Нямдоржоо та албан тушаалаа зүгээр л тавиад өгч болохгүй байгаа юм уу. Яагаад албан тушаал суудлын араас үхэн хатан зууралдаад байдаг юм бэ. Танай намын нөхөд суудлаа зүгээр өгчих гэхэд та “та нарыг сонгуульд ялуулах бүх булхайг би хийж байна. АН-ын зүгээс гаргаж ирсэн цахим үнэмлэхийг хүртэл хүчингүй болгоод байхад та нар ингэж хандаж болохгүй” гэсэн юм биш үү” гэж асуулаа.

Мөн С.Эрдэнэ гишүүн “Таныг тойрсон маш олон асуудал яригдаж байна. Хөнжилдөө хууль зассан. Хаус хөлсөлсөн. ОХУ-тай холбоотой маш олон асуудал хөндөгдөж байна. Таны паян дуусахгүй. Зүгээр суудлаа тавиад өгчихөж болохгүй байгаа юм уу” гээд санал хураалтыг нууцаар явуулах санал гаргалаа. Мөн АТГ-ынханаас Хууль зүйн сайдыг авлигын хэрэгт холбогдсон талаар материал өгсөн. Тэр асуудал юу болж байна вэ. Сайд өөрөө үнэн зөв шийдэгдэж байгаа гээд яриад яваад байх юм гэдгийг асуулаа. Ц.Нямдорж сайд “Улсын бүртгэлд өөрчлөлт хийсэн нь үнэн.

Гэхдээ цахим иргэний үнэмлэх зайлшгүй шалтгаанаар хойшлох болсон гэдгийг та бүхэн сонссон. Би Америкийн компанийн ажиллагаанд нөлөөлж чадахгүй. Өөрөө огцрох асуудлын талаар би мэдэхгүй. Их хурал шийдвэрээ гаргана. Намайг хууль зөрчсөн гэдэг үндэслэл тавьж байгаа хүмүүс өөрсдөө хууль зөрчсөн учраас би энд сууж байна. Хууль зөрчөөгүй гэдгээ шийдүүлнэ. Айван тайван сонгууль хийлгэж өгөөд суудлаасаа холдоно гэдгээ хэлсэн. Намайг төрд байгаа цагт хэзээ ч нууц гэрээ байгуулахгүй, хууль бус наймаа цэцэглэхгүй. Мөн үндэсний аюулгүй байдал алдагдахгүй гэсэн” хариултыг өгсөн юм. Нууц гэрээ гээд байгаа хууль бус наймаа цэцэглэж байна гэж өөрийгөө өмгөөлж битүү хатуу зүйл яриад байх хэрэггүй гэдгийг С.Эрдэнэ гишүүн хэллээ.

Харин Хууль зүйн сайд нууц гэрээ гэгчийг байгуулаагүй гэдгийг нь тогтоочихсон Х.Баттулга гишүүний асуудлыг дэлгэж тавьсанаас өөр үг хэлж чадсангүй. Л.Гүндалай гишүүний хэлж байгаагаар Ц.Нямдорж сайдыг ард түмэн хурдхан огцроод, далд ороод өгөөсэй гэж бодож байгаа ажээ. Хуралдаан үргэлжилсээр байна.