Монгол Улсын Их Хурлын дарга Д.Амарбаясгалан, Улсын Их Хурлын даргын дэргэдэх зөвлөлийн бүрэлдэхүүн Санхүүгийн зохицуулах хороонд ажиллаж байна. УИХ-ын намрын чуулганаар Санхүүгийн зохицуулах хорооны дарга, орон тооны бус гишүүдийг томилж, УИХ-аас тодорхой үүрэг чиглэл өгсөн бөгөөд иргэдийн хэрэглээний зээлийн хүүг бууруулах чиглэлээр шийдвэр гарсантай холбогдуулан Санхүүгийн зохицуулах хорооны санхүүгийн салбарт авч хэрэгжүүлж буй арга хэмжээтэй танилцаж байна.

Санхүүгийн зохицуулах хорооны дарга Т.Жамбаажамцын танилцуулгадаа тус байгууллагын хэрэгжүүлж буй захиргааны хэм хэмжээний 79 актыг цөөрүүлж 35 болгосон бөгөөд энэ нь журам нэрийн дор аж ахуйн нэгжүүд, иргэдэд хүндрэл учруулдаг байдлыг багасгаж буй хэлбэр гэдгийг тодотголоо. Түүнчлэн, Санхүүгийн зохицуулах хороо нь 33 тусгай зөвшөөрөл, 26 энгийн зөвшөөрөл олгодог бөгөөд Зохицуулалтын салбарын тухай хуулийн нэмэлт, өөрчлөлтийн хуулийн төсөлд уг зөвшөөрлийн тоог багасгаж, тусгай зөвшөөрлийг 30, энгийн зөвшөөрлийг 15 болгож бууруулах талаар Засгийн газрын Хэрэг эрхлэх газарт хүргүүлсэн байна.

Манай улсад 573 банк бус санхүүгийн байгууллага (ББСБ) үйл ажиллагаа явуулж байгаа бөгөөд 2 сая 300 мянган зээлдэгчтэй. Тэдгээр зээлдэгчдийн 75 хувийг цахим зээлдэгчид эзэлж байна гэсэн судалгаа гарчээ. Өнгөрсөн хугацаанд 77 ББСБ арилжааны банкуудаас 622 тэрбум төгрөгийн төгрөгийн зээл авсан байгаа нь ББСБ-ын хэрэглээний зээлийн хүү өндөр байгаа гол шалтгааны нэг гэдгийг Санхүүгийн зохицуулах хорооны дарга Т.Жамбаажамц танилцууллаа. Тиймээс энэ оны 03 дугаар сарын 20-нд Санхүүгийн зохицуулах хорооноос ББСБ нь арилжааны банкаас зээл авдгийг хориглож, гадаадын улс орнуудаас эх үүсвэр татахыг нээсэн байна. Мөн ББСБ-ын зээл олголтод өр орлогын харьцааг 60:40 болгож чангатгажээ.

УИХ-ын гишүүдийн зүгээс зээлийн хүүг бууруулах, мөнгө хүүлэлттэй тэмцэх чиглэлээр СЗХ ямар арга хэмжээ авч хэрэгжүүлж буй талаар тодруулж асуулаа. Санхүүгийн зохицуулах хорооны дарга Т.Жамбаажамцын зүгээс хөрөнгийн зах зээлийг хөгжүүлснээр санхүүгийн зах зээл олон тулгуурт болж хөгжинө гэдгийг тодотголоо. Ингэснээр компаниуд хөрөнгийн зах зээлээс хөрөнгө оруулалт татаж, бизнесээ хөгжүүлэх, тэлэх боломжтой гэдгийг онцолж байна. Түүнчлэн, мөнгөн зээл олгож байгаа иргэн, хуулийн этгээдийг албан ёсоор бүртгэдэг болж, сарын хүүгийн дээд хязгаарыг 4.5 хувь болгожээ хэмээн Улсын Их Хурлын Хэвлэл мэдээллийн газраас мэдээллээ.