УИХ-ын чуулганы /2025.04.03/-ны өдрийн хуралдаанаар Хүний эрх, эрх чөлөөг хангахтай холбоотой зарим хуульд нэмэлт, өөрчлөлт оруулах тухай хуулийн төслийг хэлэлцлээ.

Хэлэлцэж буй асуудалтай холбогдуулан гишүүд асуулт асуулаа.

УИХ-ын гишүүн Ц.Мөнхтуяа:

Хүний эрх, эрх чөлөөг хангахтай холбоотой зарим хуульд нэмэлт өөрчлөлт оруулах тухай хуулийн төслийг дэмжиж байгаа. Төрийн албаны тухай хуулийн 37 дугаар зүйлийн 37.1 дээр улс төрийн албан хаагчаас бусад төрийн албан хаагч төрийн албан тушаал эрхлэх хугацаандаа улс төрийн аливаа нам, эвсэл, хөдөлгөөний үйл ажиллагаанд ямар нэг хэлбэрээр оролцохгүй байна гэсэн хориг ороод ирж байгаа. Гэтэл Үндсэн хуулийн 16.10-ыг төрийн албаны тухай хуулийн 37 дугаар зүйлийн 37.1 1.4 37.1.5 зөрчөөд байна О.Алтангэрэл сайд аа! Үүн дээр анхаарч өгнө үү.

Нэгт, Төрийн тусгай болон төрийн захиргааны албан хаагчдын улс төрийн эрхийг бол хааж болно гэж үзэж байгаа. Харин төрийн үйлчилгээний албан хаагчид буюу эмч, багш нарын улс төрийн эрхийг ингэж хааж боогдуулах нь зөв үү?

Хоёрт, Монгол Улсын Үндсэн хууль болон олон улсын хүний эрхийн гэрээ фактуудаа төрийн албаны тухай хуулийн 37 дугаар зүйл зөрчөөд байна. Та үүнийг зөрчиж байна гэж үзэж байна уу?

Гуравт, Багц хуульдаа төрийн үйлчилгээний албан хаагчдын улс төрийн намын гишүүн байх үйл ажиллагаанд оролцох эрхийг нээх боломж байна уу? Төрийн үйлчилгээний албан хаагчдын улс төрийн эрх төрийн албаны тухай хуулийн 37 дугаар зүйл дээр бол ноцтой зөрчигдөж байгаа нь маш их гомдол дагуулж байгаа. Энэ тал дээр бас анхаарч ажиллаач ээ. Хүний эрхийн зөрчилтэй холбоотой бас нэг хууль чинь энэ дээр байгаа шүү!