УИХ-ын чуулганы /2025.04.03/-ны өдрийн хуралдаанаар Хууль тогтоомжийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийн хэлэлцэх эсэхийг хэлэлцлээ.

Хэлэлцэж буй асуудалтай холбогдуулан гишүүд асуулт асуулаа.

УИХ-ын гишүүн Ж.Батжаргал:

Энэ хууль нь гол хууль л даа. УИХ үнэхээр хууль тогтоох эрх мэдлийг хадгалдаг бол УИХ-аар хэлэлцэгдэх гэж байгаа хуулийн төлсийн боловсруулалтад тавигдах шаардлага буюу стандарт техникийг нь зааж өгсөн хууль юм. Тиймээс энэ хуульд ач холбогдол өгч боловсронгуй болгох ёстой. Үзэл баримтлалын хувьд дэмжээд хэлэлцүүлгийн түвшинд сайжруулахад анхаарах хэрэгтэй гэж үзэж байна. Хуулийн төслийг дагуулж, тодорхой хуулийн төслүүд өргөн барьдаг. Үүнд гажиг бий юу гэвэл бий. Үзэл баримтлалд нь нийцэж гаргах ёстой хуулийн төслийг дагуулаад “Малгай хууль”-ийнх нь өөрчлөлтийг оруулаад ирдэг. Тухайлбал, төсвийн хүрээний мэдэгдлээ төсвөө дагуулаад өргөн барьчихдаг гэсэн үг. Мөн хуулийн шинэчилсэн найруулгыг дагалдаад нэмэлтүүд оруулаад ирдгийг бид зогсоох хэрэгтэй.

Захиргааны хэм хэмжээ, эрх тогтоож болох ч бүгдийг хуулиар зохицуулж чадахгүй. Амьдрал үргэлжилж байгаа л бол шинэ зүйлс бий болсоор байдаг. Захиргааны хэм хэмжээ тогтоосон актуудыг бүртгэдэг Нэгдсэн сан гэж бий. Тэнд хуулиас давсан журмуудыг яаагаад бүртгээд байна вэ? Нөгөө талаас зарим журмууд яагаад бүртгэгдэхгүй байна вэ? Үүнээс үүдэх хохирлыг журам гаргасан хүн хариуцах зохицуулалттай. Энэ байгууллагынхаа бодлого, үйл ажиллагааг чангатгах шаардлагатай.

Дагуулаад авч хэрэгжүүлэх арга хэмжээний тогтоол санаачилсан байна. 1.2-т  2025 оны Намрын чуулганаас өмнө тус хуулийн төслийн 27-д тусгасан шаардлагыг хангуулж хуулиудын нэмэлт өөрчлөлт оруулж ирэх тухай заажээ. Нэлээн өргөн хүрээний ажил болох нь харагдаж байна. Хэчнээн хуулийн нэмэлт боловсруулах вэ? Төлөвлөсөн тоо байна уу? 

 Түүний асуултад УИХ-ын гишүүн Д.Цогтбаатар хариуллаа