Улсын бүртгэлийн ерөнхий газрын дарга Д.Дэлгэрсайхан БНСУ-ын Дээд шүүхийн харьяа төрийн албан хаагчдын сургалтын төвийн дарга Мүн Дэ Ёон тэргүүтэй албаны төлөөлөгчдийг хүлээн авч уулзлаа.

Улсын бүртгэлийн ерөнхий газрын дарга Д.Дэлгэрсайхан төлөөлөгчдийг Монгол улсад бидний урилгыг хүлээн авч, хүрэлцэн ирсэн явдалд талархал илэрхийлээд Монгол улсын Улсын бүртгэлийн байгууллага нь иргэн, эд хөрөнгө, хуулийн этгээдийн улсын бүртгэлийн үйлчилгээг үзүүлдэг, улсын хэмжээнд цахимжилтаараа тэргүүлж буй байгууллага юм. Сүүлийн жилүүдэд цахим шилжилт эрчимтэй нэмэгдэж, техник технологийн хөгжил хурдацтай өөрчлөгдөж байгаатай холбогдуулан албан хаагчдыг чадавхижуулах асуудал хурцаар хөндөгдөж байна. Энэ цаг үед манай байгууллагын албан хаагчдыг чадавхижуулах чиглэлд биднийг дэмжин ажиллаж байгаад талархаж, цаашид энэ хамтын ажиллагааг өргөжүүлэн хөгжүүлж, хамтран ажиллана гэдэгт итгэлтэй байгаагаа илэрхийлэв.

Улсын бүртгэлийн ерөнхий газар нь БНСУ-ын тус байгууллагатай 2019 онд хамтран ажиллах тухай санамж бичгийг байгуулснаас хойш улсын бүртгэлийн байгууллагын 100 гаруй албан хаагч тус төвийн чадавхижуулах сургалтад хамрагдсан байна.

Уулзалтын төгсгөлд БНСУ-ын Дээд шүүхийн харьяа төрийн албан хаагчдын сургалтын төвийн дарга Мүн Дэ Ёон 2 байгууллагын хамтын ажиллагааг цаашид өргөжүүлэн, улсын бүртгэлийн байгууллагын албан хаагчдыг сургах, мэргэшүүлэх тал дээр хамтран ажиллахаа илэрхийлснээр тус уулзалт өндөрлөв.