“Улаанбаатар үндэсний хоолны өдөрлөг” Д.Сүхбаатарын талбайд боллоо.

Уг өдөрлөг нь монгол үндэсний болоод олон орны хоолны соёлыг гадаад, дотоодын иргэд, жуулчдад таниулан, сурталчлах, иргэдийн эрүүл зөв хооллолтын талаарх ойлголтыг нэмэгдүүлэх, гудамжны хоолны соёлыг түгээн дэлгэрүүлэх, тусгай сонирхлын аялал жуулчлалыг хөгжүүлэх зорилготой юм. Тус арга хэмжээнд хоол үйлдвэрлэлийн чиглэлээр үйл ажиллагаа явуулдаг 30 орчим иргэн, аж ахуй нэгж оролцсон байна.

Нийслэлийн Засаг даргын орлогч З.Төмөртөмөө тус өдөрлөгийг нээж үг хэлэхдээ “Нийслэлийн Аялал жуулчлалын газраас “UB food festival” арга хэмжээг найм дахь жилдээ зохион байгуулж байна. Өнгөрсөн хоёр жил цар тахлын нөхцөл байдлаас шалтгаалан цахим хэлбэрээр зохион байгуулсан. Хоол үйлдвэрлэлийн чиглэлээр үйл ажиллагаа эрхэлж буй иргэд, аж ахуй нэгжүүд маань үндэсний хоолоо сурталчлан таниулах хэрэгтэй. Хотын даргын зүгээс ч мөн гудамжны хоолны соёлыг дэлгэрүүлэх, иргэд, аж ахуй нэгжүүд ямар нэг дарамт шахалтгүйгээр үйлдвэр, үйлчилгээгээ эрхлэх нөхцөлийг бүрдүүлэхэд анхаарч байгаа. Иргэдийн ая тухтай байдлыг алдагдуулахгүй, явган зам дээр орц, гарц хааж зогсохгүй, хүнсний аюулгүй байдлыг чанд хангасан хэн бүхэн хүссэн үйлчилгээгээ иргэдэд хүргэж болох юм. Бид цаашид энэ асуудалд илүү анхаарах болно. Та бүхэн сайхан хооллоорой” хэмээсэн юм.

2013 оноос хойш “UB food festival” нэрээр зохион байгуулж буй тус өдөрлөгийн үеэр “Cosplay & Comic night” тэмцээн болоод бургер, зайрмагийн тэмцээнийг зохион байгуулжээ. Зайрмагийн тэмцээнийг зургаа хүртэлх насны таван хүүхдийн дунд явуулсан бөгөөд ялагчаар Э.Энхтүвшин хүү шалгарлаа. Тэрбээр “Өнөөдөр миний төрсөн өдөр. Төрсөн өдрөөрөө зайрмагны тэмцээнд ороод түрүүлсэндээ баяртай байна. Шагналынхаа эрхийн бичгээр эгч, дүү нартаа зайрмаг авч өгнө. Одоо удахгүй гоё хоол идээд, гэртээ харьж төрсөн өдрийн тортоо иднэ. Дараа жил дахиж ийм тэмцээнд оролцмоор байна” хэмээн сэтгэгдлээ хуваалцав.

Монгол Улсын мастер тогооч Х.Монхор:

-Би 41 жил тогооч мэргэжлээр ажиллаж байна. Миний шавь нар өнөөдрийн энэ арга хэмжээнд оролцож байгаа. Хоол бол хамгийн чухал зүйл. Ялангуяа зөв хооллолт. Хүн өдөрт хэдэн ч удаа хооллож болно. Гол нь шим тэжээлтэй, зөв хоолоо сонгож, шаардлагатай илчлэгээ авах нь чухал. Шавь нарынхаа асраар зочлон ямар хоолыг хэрхэн хийж байгааг амтлан, өөрийн зүгээс зөвлөгөө өгөөд явж байна.

“Намасте” Энэтхэг рестораны Борлуулалт, маркетингийн менежер Э.Гантөгс:

-“UB food festival” арга хэмжээг жил бүр уламжлал болгон зохион байгуулж ирсэн. Бид энэ арга хэмжээг анх зохион байгуулж ирсэн цагаас нь эхлэн оролцож байгаа. Цар тахлаас шалтгаалж хоёр жил тасалдсан ч энэ жилийн хувьд иргэд, жуулчид маш олноор сонирхон, үйлчлүүлж байна. Нийслэлийн Аялал жуулчлалын газраас бидэнд маш их дэмжлэг үзүүллээ. Тухайлбал, асрын түрээс авахгүйгээр, сурталчилгаа, үзүүлэх тоглолт зэргийг зохион байгуулж байгаад нь маш их талархаж байна. Манай асраас тахианы махтай болон үхрийн махтай карри, бин, будаа зэргийг зах зээлийн хамгийн доод үнээр амтлан, энэтхэг хоолны соёлыг мэдрэх боломжтойг онцолъё.

Мастер тогооч Б.Баттулга:

-Бид уг арга хэмжээнд хоёр дахь жилдээ оролцож байна. Хоолны соёл сүүлийн жилүүдэд маш их хөгжиж байгаа. Бусад улс орны хоолны соёл ч ихээр нэвтэрч байна. Бид өнөөдөр Узбек үндэсний хоол болох пловоор иргэдэд үйлчилж байгаа. 500 литрийн багтаамжтай тогоонд 300 хүний порцоор хоолоо хийсэн. Иргэд ч маш ихээр сонирхон үйлчлүүлж байгаад баяртай байна. Сүүлийн үед ер нь төрийн байгууллагуудаас биднийг ихээр дэмжиж, энэ мэт арга хэмжээг зохион байгуулж буй нь тун таатай санагдаж байгаа.

“Uncage” төрийн бус байгууллагын залуус:

-“Uncage” бол залуусыг тогтвортой хөгжил, боловсролын төвөөр хангах зорилготой төрийн бус байгууллага. Бид энэ жил хотын зарим хананд граффити хийж байгаа. Уг ажилд шаардлагатай будаг, багаж хэрэгслийн зардлаа босгох зорилгоор тус арга хэмжээнд оролцож байна. Манай төрийн бус байгууллагын залуус өөрсдийн хийсэн амттан, гар урлалын бүтээгдэхүүн, стикерүүдийг борлуулж байгаа. Бид ер нь Нийслэлийн Аялал жуулчлалын газартай тогтмол хамтран ажилладаг. Өнөөдөр ч гэсэн тус байгууллагаас биднийг дэмжин, ямар нэг түрээс авахгүйгээр үйл ажиллагаагаа сурталчлах боломжийг олгож байгаад баяртай байна.