Улс орны хөгжил, бүтээн байгуулалтын өнгө төрх болсон барилгын салбарт ажиллаж буй нийт барилгачид, инженерүүд, үе үеийн ахмадууд, салбарын алдар гавьяатнууд Та бүхэнд Монголын шинэ үеийн барилгын салбар үүсч хөгжсөний 87 жилийн ойн баярын мэнд хүргэе.

Шинэчлэлийн Засгийн газрын бүтцээр Барилга, хот байгуулалтын яам дангаараа байгуулагдаж салбарын хууль эрх зүйн орчныг сайжруулах, хот суурин, шинэ суурьшлын бүс нутгийн төлөвлөлтийг боловсронгуй болгох, барилгын материалын үйлдвэрлэлийг нэмэгдүүлж барилгын үйлдвэрлэлийг эрчимжүүлэх, иргэдийг орон сууцаар хангах зэрэг бодлогын томоохон зорилтот асуудлуудыг шийдвэрлэхийн зэрэгцээ барилгын ажил үйлчилгээтэй холбоотой хүнд суртал, шат дамжлагыг бууруулах, төрийн бус байгууллагатай хамтран ажиллах асуудалд онцгой анхаарал хандуулан ажиллалаа.  

Салбарын хууль эрх зүйн орчныг боловсронгуй болгох, барилгын үйлдвэрлэлд чанар стандартын шаардлага хэвшүүлэх ажлын хүрээнд “Барилгын тухай”, Хот байгуулалтын тухай, Хотыг дахин хөгжүүлэх тухай болон Газрын багц хуулиудыг шинэчлэн боловсруулж, салбарын мэргэжилтнүүд, төрийн, төрийн бус байгууллагуудын дунд  нээлттэй хэлэлцүүлэг зохион байгуулж, санал бодлыг нь тусган Улсын Их Хурал, Засгийн газарт өргөн барихад бэлэн болоод байна. Мөн “Барилгын материал, бүтээц ба эдэлхүүний чанар аюулгүй байдлын тухай” хуулийн төсөл боловсруулах ажлын хэсгийг байгуулаад байна. 

Монгол Улсын Засгийн газрын үйл ажиллагааны хөтөлбөрт тусгагдсан барилгын материалыг эх орондоо үйлдвэрлэж, гол нэр төрлийн бүтээгдэхүүний хэрэгцээг дотоодын үйлдвэрлэлээр хангах зорилтын хүрээнд 2012 оны 171 дүгээр тогтоолоор “Барилгын материалын үйлдвэрлэлийг дэмжих хөтөлбөр” батлагдлаа.

Мөн барилгын материалын үйлдвэрийн тоног төхөөрөмжийг Гаалийн албан татвараас чөлөөлүүлэх тухай асуудлыг Засгийн газрын 193 дугаар тогтоолын хавсралтад илүү өргөн хүрээтэй тусган батлуулав. 

 Үндэсний үйлдвэрлэгчдийг дэмжиж, тэдгээрийг урт хугацаатай, бага хүүтэй зээлээр санхүүжүүлэх бодлогоор яам Монгол банктай хамтран дэд хөтөлбөр батлан хэрэгжүүлж, барилгын материалын үйлдвэрүүдийн эргэлтийн хөрөнгөд зориулан 108.2 тэрбум төгрөгийн гол нэр төрлийн материал /цемент, арматур/-ыг нөөцөлж, барилгын үнэ тогтворжуулахад 146.8 тэрбум төгрөгийн зээлийн эх үүсвэрийг тус тус шийдвэрлэн аж ахуйн нэгж байгууллагуудад зээл олгоод байна.

Хүн амын орон сууцны хангамжийг нэмэгдүүлэх зорилгоор “Барилгын салбарыг дэмжих, улмаар орон сууцны үнэ тогтворжуулах” дэд хөтөлбөр хэрэгжүүлж, “Орон сууцны ипотекийн зээлийн ерөнхий журам”-ыг батлуулан ажилтай, орлоготой иргэдийг жилийн 8±1 хувийн хүүтэй, урт хугацааны ипотекийн зээлд хамруулах ажлыг зохион байгуулж байна.

Энэхүү журмын дагуу зээлийн барьцаа нь худалдан авч буй орон сууц байх бөгөөд нэмэлт барьцаа хөрөнгө шаардахгүй, орон сууцны хамтран өмчлөгчөөр бүртгэгдсэн иргэд хөнгөлөлттэй зээлд хамрагдах боломжтой болов. Түүнчлэн  шинээр баригдаж ашиглалтад орсон орон сууцнаас гадна ашиглагдаж байгаа хуучин орон сууц худалдан авах хүсэлтэй иргэд энэхүү зээлд хамрагдах боломжийг бүрдүүлж өглөө.

Монголын шинэ үеийн барилгын салбар үүсч хөгжсөний 86 жилийн ойн баярын нээлт

Одоогоор арилжааны банкууд орон сууцны зээлийн хүсэлт гаргаад байсан 15000 иргэний хүсэлтийг бүрэн шийдвэрлэж, орон сууцны ипотекийн 425.7 тэрбум төгрөгийн зээлийг дахин санхүүжүүлж, шинээр 4950 иргэнд 267.1 тэрбум төгрөгийн орон сууцны ипотекийн зээл олгоод байна.

Орон сууцны нийлүүлэлтийг нэмэгдүүлэх, Улаанбаатар хотын хөрс, ус, агаарын бохирдлыг багасгах асуудлын хүрээнд Засгийн газрын  2013 оны 118-р тогтоолоор  Улаанбаатар хотын  орон сууцны шинэ 10 хороолол, гэр хорооллын 12 байршилд инженерийн дэд бүтцийн барилга байгууламж, шугам сүлжээний ажил хийгдэхээр батлагдан барилгын ажил нь эрчимтэй хийгдэж, энэ оны  ажлын хөрөнгө оруулалт болох 200 тэрбум төгрөгийг Засгийн газрын үнэт цаас арилжаалж бүрдүүлсэн хөрөнгөнөөс Хөгжлийн банкаар дамжуулан санхүүжүүлж байна.  

Санхүүжилтээс шалтгаалан дуусаагүй байсан зарим орон сууцны барилга барьж буй аж ахуйн нэгжүүдийн барилгын ажлыг нь дуусгах зорилгоор банкны хөнгөлөлттэй зээлэнд хамруулах асуудлыг шийдвэрлэв.

Засгийн газрын 2012 оны 151 дүгээр тогтоолоор батлагдсан ”Барилгын ажлыг эхлүүлэх, үргэлжлүүлэх, ашиглалтад оруулах дүрэм”-д заасан үйл ажиллагааг барилгын ангиллын дагуу салбарын яам, орон нутгийн засаг захиргаа зохион байгуулан ажиллаж байна.  

Мөн салбарын бодлогын баримт бичгийн боловсруулалт, хөтөлбөр төслүүдэд барилгын салбарын төрийн бус байгууллага мэргэжлийн холбоодын оролцоог нэмэгдүүлэн хамтын ажиллагааны гэрээ байгуулан ажиллаж байна.

Барилгын салбарын эрдэм шинжилгээ, туршилт судалгааны ажил, шинэ технологи, хийц бүтээцийг үйлдвэрлэлд нэвтрүүлэх, стандарт, норматив баримт бичгийн боловсруулалтын ажлыг сайжруулах,  улсын төсвийн хөрөнгө оруулалтаар хийгдэх хот төлөвлөлтийн болон барилга байгууламжийн зураг төсөл, техник эдийн засгийн үзүүлэлтийг боловсруулах асуудлыг хариуцаж ажиллах чиг үүрэг бүхий “Зураг төсөл, эрдэм шинжилгээний институти”-ийг шинэчлэн байгууллаа. 

Цаашид бидний өмнө барилгын салбарын хууль эрх зүйн орчныг боловсронгуй болгохын зэрэгцээ, барилгыг үйлдвэржүүлэх замаар улирлын эрхшээл, хамаарлаас аль болохуйц гаргах, мэргэжилтэй ажилчдыг тогтвортой ажлын байраар хангах зэрэг  томоохон зорилтуудыг хэрэгжүүлэх асуудал  тулгарч байна.

Иймд барилгын салбарынхан та бүхнийг Засгийн газрын бодлого, зорилтуудыг хэрэгжүүлэх, салбараа хөгжүүлэхэд яамтайгаа нягт хамтран ажиллаж, ард иргэдийн ажиллаж, амьдрах ая тухтай нөхцлийг бүрдүүлэх нэр хүндтэй, хариуцлагатай ажил үйлсдээ улам их амжилт гаргана гэдэгт итгэж байгаагаа илэрхийлье.

Сайн үйлс дэлгэрч, барилгын салбар амжилт бүтээлээр дүүрэн байх болтугай.

МОНГОЛ УЛСЫН ИХ ХУРЛЫН ГИШҮҮН, ЗАСГИЙН ГАЗРЫН ГИШҮҮН,  БАРИЛГА, ХОТ БАЙГУУЛАЛТЫН САЙД            Ц.БАЯРСАЙХАН