Өнгөрсөн 14 хоногийн хугацаанд Хотын сэргэлт-Шинэ Улаанбаатар мөрийн хөтөлбөрийг маань сонирхон судалж, уулзалтуудад цаг заваа гарган хүрэлцэн ирсэн нийт иргэддээ баярлалаа.

Өнгөрсөн дөрвөн жилд УИХ, Засгийн газраас өнөөгийн Улаанбаатарын маш том эрхзүйн орчныг бүрдүүлж өгсөн. Шинэ гараа эхлүүлэх боломж нээгдсэн гэсэн үг. Саяхан тэрбумаар яригдаж байсан төсөвтэй, төсвийн орлого л суурь болж байсан бол шинэ эрхзүйн орчноор 66 хуульд өөрчлөлт оруулж, эдийн засгийн маш олон төрлийн сонголтыг хийх болсон. Жишээ нь, нийслэл бонд гаргаснаар олон хөрөнгө оруулалт татаж, бүтээн байгуулалтаа хийх боломжтой болсон.

Ирэх дөрвөн жилд энэ олон боломжид үндэслэж хотын хэт төвлөрлийг задална. Дагуул хот, дэд төвүүд буюу дэд бүтцийн сонголттой, бие даасан шийдвэрээ гаргаж чадах хурлыг байгуулах боломжтой болсон.

Үндсэн хуулийн хоёр удаагийн нэмэлт өөрчлөлт, хотын эрхзүйн орчныг сайжруулсан 66 хуулийн ард хотын иргэдийн аж амьдрал дээшилнэ. 2024-2028 он бол эрхзүйн шинэчлэлтээ үр дүнд хүргэх чухал цаг үе юм.