Инновац, цахим бодлогын байнгын хорооны /2025.04.03/-ны өдрийн хуралдаанаар Нийтийн мэдээллийн ил тод байдлын тухай хууль болон Мэдээллийн технологийн үйлдвэрлэлийг дэмжих тухай хуулийн хэрэгжилтийн талаар Цахим хөгжил, инновац, харилцаа холбооны сайд мэдээлэл хүргэлээ.

Хэлэлцэж буй асуудалтай холбогдуулан гишүүд асуулт асууж, мэдээлэл өглөө.

УИХ-ын гишүүн Д.Бум-Очир:

Хилийн чанад дахь Монголчуудын зөвлөл УИХ-д тавьсан хүсэлтээ надад хаяглаж ирүүлсэн. Өмнө нь Ерөнхийлөгчийн Соёл Шашны бодлогын зөвлөхөөр ажиллаж байх үед хамтарч ажиллаж байсан. Хилийн чанад дахь монголчуудын эрх ашгийг хамгаалах УИХ-ын лобби буюу дэмжих бүлэг байгуулах хүсэлтийг хүлээж аваад энэ чиглэлээр ажиллах сонирхолтой гишүүдэд санал тавихад 19 гишүүн зөвшөөрч бүлгээ байгуулаад миний бие ахлаад явж байна. 2025 оны 1-р сарын 14-ний өдрийн Байнгын хорооны хуралдаанаар хилийн чанад дахь монгол иргэдийн төрийн цахим үйлчилгээ E-Mongolia-г ашиглах боломж, цахимаар сонгуульд оролцох эрхийг хангах талаар СЕХ, Үндэсний Дата Төвөөс мэдээлэл хийсэн. Энэ мэдээлэлд үндэслэж ажлын хэсэг гаргах шийдэлд хүрсэн. Тус ажлын хэсэг нь хилийн чанад дахь иргэдэд цахимаар сонгуульд оролцох эрхийг хангах боломжийг судлан санал дүгнэлт танилцуулах зорилготой. Бид ажлын хэсгийнхээ удирдамж, ажлын төлөвлөгөөг боловсруулах шатанд явж байна. Ирэх 7 хоногийн ажлын хэсгийн хурлаар гишүүдийнхээ нэрсийг эцэслэн тогтоод удирдамж, төлөвлөгөөгөө батална. Мөн энэ ажлыг дэмжин ажиллах бүрэлдэхүүнийг байгуулахаар ГХЯ, ЦБИХХЯ, СЕХ, ТЕХ, Улсын бүртгэлийн Ерөнхий газар зэрэг байгууллагуудад хүсэлт явуулсан байна.