Шатахууны үнэ нэмэгдэх тухай яриа энэ долоо хоногийн турш хаа сайгүй өрнөв. Асар хурдтай түгсэн энэ мэдээллийн дараа нийслэлд үйл ажиллагаа явуулж буй ШТС-уудад урт дараалал үүссэн бөгөөд тэд нэг машинд олгох шатахууны хэмжээнд хязгаар хүртэл тавьсан.

Нийслэлд өнөөдрийн байдлаар шатахууны үнэ нэмэгдээгүй байгаа ч орон нутагт өсөөд эхэлчихжээ. Тухайлбал, Өвөрхангайн Төгрөг суманд нэг литр нь 1690 төгрөг байсан А-80 бензин 1800, 1800 төгрөгөөр зарагдаж байсан дизель түлш 2000 төгрөг болж өсчээ. Мөн Ховд аймагт литр нь 1950 төгрөгийн үнэтэй байсан дизель түлш өчигдөрөөс 2200 төгрөгөөр зарагдаж эхэлсэн байна.