Өнөөдрийн байдлаар буудлагын О.Гүндэгмаа, хөнгөн атлетикийн Б.Сэр-Од, Л.Отгонбаяр, байт харвааны Ж.Гантөгс, Б.Урантунгалаг, чөлөөт бөхийн О.Насанбурмаа, У.Чулуунбат, боксын У.Мөнх-Эрдэнэ, П.Сэрдамба нар Лондонгийн олимпод оролцох эрхээ аваад байна. Түүнчлэн Паралимпийн жүдо бөхийн Б.Ганбат, П.Болортуяа, А.Мөнхбат, Д.Ганбат, М.Очирхуяг, байт харвааны Б.Оюун-Эрдэнэ, Б.Жавзмаа, буудлагын Ц.Лхамсүрэн, хөнгөн атлеттикийн Г.Мөнхбат нар эрхээ авчээ.

Үндэсний шигшээ багийн тамирчид өвөл, зун, паралимпийн спортын 14 төрөлд насанд хүрэгчид, залуучуудын ангилалаар 142 тамирчин, 34 дасгалжуулагч  ирэх олимпод бэлтгэж байгаа тухай Монгол Улсын Шадар сайд М.Энхболд Засгийн газрын хуралдаанд танилцуулав. Шигшээгийнхэн тив, дэлхий, олон улсын чанартай тэмцээнд амжилттай оролцож, энэ оны 11 дүгээр сарын байдлаар 21 алт, 61 мөнгө, 86 хүрэл, нийт 198 медаль хүртээд байна.

Цаашид Эрдэнэт хот дахь Олимпийн баазын тохижилт, материаллаг баазыг бэхжүүлэхэд шаардлагатай тоног төхөөрөмж, тамирчдын хоолны газрыг шинэчлэх, бокс, хүндийн өргөлтийн тамирчдын бэлтгэл сургуулилт хийх нөхцлийг бүрдүүлэх, спортын хэрэглэл, материал худалдан авах асуудлыг шийдвэрлүүлэхийг Эрүүл мэндийн сайд С.Ламбаад Засгийн газрын хуралдаанаас даалгалаа. Мөн “Олимп хөгжил” сангийн ажлыг эрчимжүүлэн хөрөнгө мөнгө хуримтлуулах ажлыг төрийн болон төрийн бус байгууллагуудтай хамтран зохион байгуулахыг Сангийн Удирдах зөвлөлийн дарга, Шадар сайд М.Энхболд, орлогч дарга, Сангийн сайд С.Баярцогт нарт даалгажээ.

Манай улсын баг тамирчид 11 удаа зуны олимпод оролцон 3 алт, 7 мөнгө, 10 хүрэл медаль хүртсэн. 2008 оны Бээжингийн XXIXолимп, Паралимпийн XIIIнаадмаас 3 алт, 2 мөнгөн медаль хүртэж 204 орноос 31 дүгээр байрт шалгарсан юм.  Ирэх олимпод медалийн буухиаг таслалгүй, амжилтаа бататгах нь манай гол зорилт болоод байна. Засгийн газрын хэвлэл мэдээллийн албанаас мэдээллээ.