Улсын бүртгэлийн ерөнхий газар Засгийн газраас 2008 гаргасан “Нээлттэй хаалганы өдөр”-ийг сар бүр зохион байгуулж хэвшсэн. Тус байгууллагынхан өнгөрсөн бямба гаригт зохион байгуулсан “Нээлттэй хаалганы өдөр”-ийг “Иргэд газар өмчлөх эрхээ бүртгүүлэх” сэдвийн дор зохион байгуулсан юм. Энэ үеэр иргэд олон нийтэд газар өмчлөх эрхээ улсын бүртгэлд бүртгүүлэхэд бүрдүүлэх баримт бичиг, улсын бүртгэлд бүртгүүлэхийн ач холбогдол, эдийн засгийн эргэлтэд хэрхэн яаж оруулах, гарч болох зөрчил, тэдгээрийг арилгах арга замын талаар нарийвчилсан заавар, зөвлөгөө өгчээ. Энэ үеэр УБЕГ-ын Эд хөрөнгийн бусад эрхтэй холбогдсон бүртгэлийн хэлтсийн дарга Н.Бямбадоржтой уулзахад “Манайх эд хөрөнгө өмчлөх эрх, түүнтэй холбоотой эд хөрөнгийн бусад эрхийн бүртгэлийн тухай хуулийн дөрөвдүгээр зүйлд заасан 10 төрлийн бүртгэлийн наймыг нь хийдэг.

Эд хөрөнгийн эрхийн бүртгэлийн газар өдөрт бүртгэлийн 700-800 мэдүүлэг хүлээн авч байна. Энэ нь өмнөх оныхоос ачаалал 70 орчим хувиар нэмэгдсэн. Бидний хүлээн авч байгаа энэ мэдүүлгүүдийн 80 хувийг нь барьцааны гэрээ эзэлж байна. Эдийн засгийн хөгжил, банк, банк бус санхүүгийн байгууллагад үл хөдлөх хөрөнгөө барьцаалж, эдийн засгийн эргэлтэд оруулж байгаатай холбоотойгоор ачаалал нэмэгдсэн. Нээлттэй хаалганы өдрийн зорилго нь ажлын өдрүүдэд авч чадаагүй үйлчилгээг иргэдэд хүргэх. Энэ өдөрлөгийн үеэр иргэд УБЕГ, түүний харьяа байгууллагуудын үйлчилгээг бүрэн авч чадаж байгаа. Манай иргэдийн дунд газар өмчлөх Засаг даргын захирамжийг гаргуулж авангуутаа л бүрэн өмчлөх эрхтэй боллоо гэсэн ташаа ойлголттой холбоотой болдог бололтой. Газар өмчлөх эрхийн гэрчилгээгээ улсын бүртгэлд бүртгүүлснээр өмчлөх эрх үүсдэг хуультай. Улсын бүртгэлд өмчлөх эрхээ бүртгүүлээгүйгээс маш том зөрчил үүсдэг. Тиймээс газар өмчлүүлэх тухай Засаг даргын захирамжаа заавал улсын бүртгэлд бүртгүүлж аваарай” гэв.