Төрийн албан хаагчдын цалинг он гараад нэмэх шийдвэр гараад байгаа билээ. НХХЯ-ны дэд сайд Д.Нямхүүгийн хэлснээр энэ шийдвэр ирэх шинэ оны  3-р сарын нэгнээс эхлэн хэрэгжих юм. Ингэхдээ цалинг тодорхой дараалалтайгаар нэмэх ажээ. Эхний ээлжид төрийн албан хаагчдын цалинг ижил хэмжээнд буюу 80 мянган төгрөгөөр нэмэхээр болжээ.

Дараагийн ээлжийн ажил тавдугаар сарын 1-нээс хийгдэх юм.  Харин энд цалинг 23 хувиар нэмнэ.  Одоогоор төрийн албан хаагчдын цалингийн доод хэмжээ нь 180 мянган төгрөг байгаа юм. Энэ нь гуравдугаар сарын 1-нээс 260 мянган төгрөг болно. Харин тавдугаар сарын 1-нээс  320 мянган төгрөг болох юм.  Үүнээс харахад төрийн албан хаагчдын цалин 77,7 хувиар өсөх тооцоо гарсан байна. Төрийн захиргааны албан хаагчдын цалин  611 мянган төгрөгөөс 850 мянга болж 39 хувиар өснө. Харин төрийн албан хаагчдын дундаж цалин өнөөдөр 408 мянган төгрөг байдаг бол 630 мянгад хүрэх юм.