УИХ-ын чуулганы /2025.04.03/-ны өдрийн хуралдаанаар Монгол Улсын Ерөнхий сайдаас Улсын Их Хуралд ирүүлсэн Авлигатай тэмцэх газрын дарга З.Дашдавааг улируулан томилуулах тухай саналыг хэлэлцлээ.

Хэлэлцэж буй асуудалтай холбогдуулан гишүүд үг хэллээ.

УИХ-ын гишүүн Д.Үүрийнтуяа:

“Транспэрэнси Интернэшнл” ОУ-ын байгууллагын хийсэн судалгаагаар авлигын төсөөллийн индексээр дээгүүрт жагсдаг орнуудын авлигатай тэмцдэг байгууллагынх нь удирдлага тогтвортой ажилладаг юм байна. Дунджаар 10 жил. Энэ индексээр сүүл мушгиж буй орнуудын авлигатай тэмцэх байгууллагынх нь удирдлага ойр ойрхон солигддог судалгаа гарчээ. Манай улс хуулиа батлаад 11 жилийн дараа авлигатай тэмцэх газраа байгуулсан. 18 жилийн настай. Эхний 12 жил 4 дарга солигдсон бол сүүлийн 6 жил З.Дашдаваа үр дүнтэй ажиллаж байна. Монгол Улс авлигатай тууштай тэмцэх ёстой. Ерөнхий сайд энэ чиглэлд шийдвэр гаргаж, АТГ бодит үр дүнд хүргэж байна гэж үздэг. Манай нийгэмд 20, 30 жил бугшсан суурь идээгээ 5 жилийн дотор шахаад гаргачих үр дүн нэхээд байна. Дийлдэхгүй эрх мэдэл, мөнгөтэй, улс үндэстэн дамнаж амьдарсан, урт гартай, олон салаа мөчиртэй бүлэг этгээдүүдтэй улс. Энэ асуудалтай тэмцэхийн тулд бидэнд тогтвортой бодлого, тогтвортой удирдлага, тогтвортой ажиллагаа хэрэгтэй. АТГ-ын мөрдөн шалгах ажиллагааны үр дүнд Төрийн өмчит компаниудын санхүүгийн сахилга бат сайжирсан, улс орон нутгийн төсөвт оруулдаг мөнгөн дүн нэмэгдсэн гэсэн тайлантай санал нэг байна. Төрийн өмчит компанид удирдах албан тушаал эрхлэх үед АТГ-аас өгсөн чиглэл, зөвлөмжийн дагуу ажиллаж байсан хүний хувьд АТГ нь үр дүнтэй ажиллаж чадсан гэж хэлнэ.