УИХ-ын чуулганы /2025.04.03/-ны өдрийн хуралдаанаар Монгол Улсын Ерөнхий сайдаас Улсын Их Хуралд ирүүлсэн Авлигатай тэмцэх газрын дарга З.Дашдавааг улируулан томилуулах тухай саналыг хэлэлцлээ.

УИХ-ын гишүүн Ц.Мөнхбат:

АТГ-ын даргаар ажиллаж байгаад үргэлжлүүлээд ажиллахаар болж буй З.Дашдаваа даргыг дэмжиж байгаа. Өнгөрсөн цаг хугацаанд хийж хэрэгжүүлж буй үйл хэрэг үргэлжлээд явах ёстой. Монгол улс авлигын индексээрээ аль болохоор амжилт гаргаж байж улс орны хөгжлийн тухай асуудал дагаж яригддаг. Ийм учраас шударга ёсны асуудал хөндөгддөг учраас таныг үргэлжлүүлээд амжилттай сайн ажиллах болов уу л гэж бодож байгаа. Мөн хүний эрхийн мэдрэмжтэй ажиллах ёстой. Ялангуяа энэ авлигатай тэмцэх газар, мөрдөгчид, ажиллаж буй албан тушаалтнууд энэ тал дээр дээд зэргийн хариуцлагатай байх ёстой гэж боддог.

Аливаа нэг албан тушаалтнуудыг мөрдөн шалгах явцад мэдээж хэн нэгэн этгээдийн гомдол санал, сонирхол хүсэл дээр л тулгуурлаж хийгддэг байх. Гэхдээ энэ нь гэмт хэрэгтэн мөн гэсэн үг биш. Эцсийн дүндээ шүүхээр орж байж, гэм буруутай нь тогтоогдож, тэр холбогдсон этгээд нийтэд зарлагдах ёстой. Гэтэл мөрдөн шалгах ажиллагаа явагдах цаг үеэс эхлээд л гэмт хэрэгтэн юм шиг нийгэмд зарлагддаг. Энэ бол хариуцлагагүй асуудал.

Сэтгүүлч

Сэтгүүлч Ц.Соёлмаа soyolmaa@vip76.mn