УИХ-ын чуулганы /2024.12.11/-ний өдрийн хуралдаанаар Монгол Улсын 2025 оны төсвийн тухай хуулийн төсөлтэй хамт өргөн мэдүүлсэн хууль, тогтоолын төслүүдийг хэлэлцлээ.

УИХ-ын гишүүн С.Бямбацогт: 

Төсөв дагасан хуулиудын анхны хэлэлцүүлэг хийж байгаа. УИХ-ын тогтоол дээр энэ орж байгаа заалтыг дэмжиж байгаа. Төсвийн ил тод, үр ашигтай байдал, санхүүгийн хяналт, хариуцлагыг сайжруулах чиглэлээр дараах арга хэмжээ авч холбогдох хууль тогтоомжид өөрчлөлт оруулъя хэмээн сая ярьж байна. Үндэсний хороодоос бас зөв үү буруу юу гээд ярьж байгаа. Түүнтэй адилхан бид нарт бас төслийн нэгжүүд гээд асуудлууд байгаа. Эгийн голын УЦС-ын төслийн нэгж гээд 40 орчим тэрбум төгрөг Хөгжлийн банкнаас зээл аваад санхүүжүүлчихсэн. Баахан цаас үйлдвэрлэчихсэн, одоо тэгээд баахан үр ашиггүй төсөв зарцуулагдчихсан байж байдаг.

Улаанбаатар хотод эмээлтийн аж үйлдвэрийн парк барина гээд хориод жил үйл ажиллагаа явуулж байгаа. Тэгсэн мөртөө нэг барилга байшин. Хийсэн ажил байхгүй. Баян-Өлгий, Алтанбулаг, Замын-Үүдийн чөлөөт бүс гэх зэрэг юу ч хийдэггүй хэдэн байгууллага байна. Эдгээрийг цэгцэлмээр байна. Цаашдаа холбогдох хууль тогтоомждоо өөрчлөлт оруулахдаа ямархуу байдлаар шийдэх юм. 

Бид томоохон төслүүд ярьж байгаа. Энэ төслүүдийн үр өгөөжийн тухай асуудал. Урьдчилсан байдлаар ТЭЗҮ судалгаа хийж үр ашиггүй байвал зогсоомоор байна. 40,50,100 тэрбумаар баахан ТЭЗҮ хийчихдэг. Тэгтэл тэр нь үр ашиггүй. Цаашид ийм байвал гаргасан зураг, төсөв, ТЭЗҮ чинь бас л хоосон цаас болоод л үлдэнэ. Эс үгүй бол тэр төслийг эхлүүлээд явдаг, төсөл явж байгаад сүүлд нь зогсдог, царцдаг. Тэр нь цемент болоод балгас болоод үлддэг. Ийм болчих вий.

Тиймээс томоохон төслүүд дээрээ урьдчилсан байдлаар бас ТЭЗҮ хийгээд үр ашигтай байгаа эсэх дээр нь эдийн засгийн хувьд судлаад, шаардлагатай бол бага дээр нь бага мөнгө зарцуулаад шаардлагагүй юм байна аа гэсэн дүгнэлтээ гаргаж хэрэгтэй.