УИХ-ын чуулганы /2025.04.04/-ний өдрийн хуралдаанаар Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэхийг хэлэлцлээ.

Хэлэлцэж буй асуудалтай холбогдуулан гишүүд асуулт асууж, байр сууриа илэрхийллээ. 

УИХ-ын гишүүн Ж.Чинбүрэн:

ЭХХШтХ-д нэмэлт өөрчлөлт оруулах тухай хуулийн төслийг бүхлээр нь дэмжиж байна. Шүүх, прокурор, мөрдөн шалгах байгууллага хэрэг хянах шийдвэрлэх ажиллагааг цахим платформ ашиглаж явуулах боломжийг хуульчлах зохицуулалтыг оруулж ирж байгаа том дэвшилттэй зүйл харагдаж байна. Энэ зохицуулалт нь технологийн хөгжилтэй нийцсэн, иргэн төвтэй, ил тод, шуурхай ажиллагааг дэмжих чухал алхам болох нь тодорхой. Хэрэг хянан шийдвэрлэх ажиллагааны зардлыг бууруулах, цаг хугацааг хэмнэх, алслагдсан бүс нутгийн иргэд оролцогчид тэгш боломж олгож байгаагаараа бас чухал нөлөөтэй байна. Цахим шийдлүүдийг хуульчлан нэвтрүүлснээр баримтжуулалт сайжирч. Нотлох баримтыг ил тод байдал, оролцогчдын эрхийг хамгаалах боломж нэмэгдэж байгаагаараа бас давуу талтай.Үүн дээр нэмээд хэдэн зүйлийг сануулан хэлье гэж бодож байна. Олон нийтийн сүлжээгээр явсан зүйл хамгийн их үнэн байдаг юм шиг.

Аливаа нэг хэрэг шүүхдээ аль нэг талд нь илүү жин дарж оролцох байдал, нөлөөлөлд автах байдал болчих вий гэдгээс их санаа зовж байна. Ялангуяа нийгэмд үүсээд байгаа 2 шатны шүүхээр гянданд хоригдох ял эдлэхээр болоод байгаа Батчулуун эмчийн хэргийн асуудал үүнтэй уялдаж байгаа. Эрүүл мэндийг хамгаалах, эмчийн ёс зүйтэй асуудлууд их нэлээд өргөн яригддаг. Дээрээс нь эрхийг нь яаж хамгаалах асуудал нь байдаггүй. Зөвхөн эмч нар ч биш. Сувилагч нар, эмч нар хүн аврах гэж яваад нөхцөл байдал нь хангагдаагүй технологи шийдэгдээгүй ийм байдлаас болоод гэмт хэрэгт холбогдох, гянданд хоригдох асуудал нэлээн хурц болоод олон олон сувилагч, эмч нар одоо ялыг нь эдэлж байна. Энэ нь өөрөө буцаагаад эрүүл мэндийн салбарт итгэх итгэлийг ард иргэдэд бууруулж байна. Олон нийтийн санал асуулгаар хамгийн их итгэл төрүүлэхгүй байгаа салбарууд гэхээр шүүхийн салбар байдаг. Үүн дээр нэмээд эрүүл мэндийн салбар орж байна. БЗД-ийнхээ шүүхийн байгууллагуудаар явж үздэг, ордог, уулздаг. Дэндүү их ачаалалтай. Прокурорын байгууллагууд нь олон хэргийг ганц хүн дээр тохдог тэрийгээ амжуулж ажиллах гэж асар их ачаалалтай байдаг учраас энэ төсөв санхүүжилт дээрээ хэдүүлээ анхаармаар байгаа юм. Энэ санхүүжилт нь хангалттай байгаад олон хэрэг бүртгэлийн асуудлууд нь шуурхай хийгдэж чаддаг. Дээрээс нь жижиг хэрэг гэж 5 сая гаруй төгрөгийн хохирол авсан иргэдийн асуудлыг шийдэхгүйгээр бүр 4, 5 жил болсон тохиолдлууд зөндөө байгаа. Энэ болгоныг цэгцлэхгүй бол энэ итгэл хэзээ ч дээшлэхгүй ээ. Тийм учраас үүн дээр онцгой анхаарч ажиллаасай. 

Мөн манай эрүүл мэндийн салбарын амбулаторийн үзлэг хийх, иргэнд хүнд хагалгаа хийхийн өмнө заавал зөвшөөрөл авдаг. Энэ зөвшөөрлийн процесс дээр видео бичлэг оруулах тал дээр ЭМЯ өөрөө анхаарал санаачилгатай ажиллах ёстой. Энийг баримтжуулж заримдаа хэлсэн зүйлийг сонсоогүй байх эсхүл иргэд маань сандарсан тэвдсэн ойлгохгүйгээсээ болоод ийм юм ярьсан яриагүйгээ санадаггүй. Тийм учраас бидэнд баримт чухал. Тийм учраас одоо эрүүл мэндийн салбарууд том том хагалгаа хийж байгаа байгууллагуудаасаа эхлээд видео бичлэг хийдэг. Амбулаторийн зөвлөгөө өгч байхдаа тэрийгээ баталгаажуулж архивладаг. Энэ нь буцаад хэрэг хянан шийдвэрлэхэд нотлох баримт болдог байх. Ийм чухал зүйлүүд дээр анхаарал татмаар санагдаж байна.