УИХ-ын чуулганы /2025.04.03/-ны өдрийн хуралдаанаар Монгол Улсын Ерөнхий сайдаас Улсын Их Хуралд ирүүлсэн Авлигатай тэмцэх газрын дарга З.Дашдавааг улируулан томилуулах тухай саналыг хэлэлцлээ.

Хэлэлцэж буй асуудалтай холбогдуулан гишүүд үг хэлж, асуулт асуулаа.

УИХ-ын гишүүн Б.Жаргалан:

2024 онд Бүгднайрамдчуудын Хүрээлэнгээс гаргасан олон нийтийн санал бодлын судалгаанд Монгол Улсад хамгийн тулгамдсан асуудлыг нийт оролцогчдын 31 хувь нь үнийн өсөлт, 30 хувь нь ажилгүйдэл, 26 хувь нь авлига гэж үзжээ.

Бидний 1 номерт тавьдаг утаа түгжрэлээс илүү авлигын асуудалд иргэд санаа зовж байна. Авлига нь өнгөрсөн 30 жилийн хугацаанд улс орны хөгжлийг хойш татаж, ЭЗ-ийн өсөлтийг сааруулсан, монголчуудын бүтээмжийг бууруулсан, чөдөр тушаа. Нийгэм бүхэлдээ авлигад идэгдсэн учраас залуус мөрөөдөхөө больсон. Шударгаар хөдөлмөрлөж, бизнес эрхлээд амжилтад хүрч чадахгүй гэсэн итгэл үнэмшилтэй болчихлоо. Мөрөөдөлгүй учраас гадагшаа гарахыг илүүд үзэж байна. Төрд л орохгүй бол боломж бололцоо байхгүй, ашиг орлого нэмэгдэхгүй, хувийн хэвшлийн орон зай хумигдсан гэсэн итгэл үнэмшил бий болоод буй үед бид ажиллаж байна. 126 гишүүнтэй шинэ парламент нь хуулийн засаглалыг бэхжүүлэх, шударга ёсыг тогтоох, авлигыг ор тас үгүй хийхэд зорьж ажиллах ёстой. УИХ, ЗГ, АТГ-т авлигыг устгаж чадах итгэл үнэмшил байгаа эсэхэд эргэлзэж байна. Ийм итгэл үнэмшлийг бий болгож байж ажил урагшилна. Та авлигыг устгаж чадна гэсэн итгэл үнэмшлээр ажиллана гэдэгтээ бүрэн төгс итгэлтэй байна уу нэр дэвшигч ээ?

Түүний асуултад АТГ-ын дарга З.Дашдаваа хариуллаа.